Dili na maihap sa mga tudlo ang gidaghanon sa mga eskandalo nga naglambigit sa mga sakop sa simbahang Katoliko. Gikan sa mga pari nga gipasanginlang nanglugos, mimolestiya sa mga sakristan, nagbinastos sa mga tinun-an samtang mipakumpisal ug daghan pa.
Ang labing awahing hitabo nga nakamugna og eskandalo mao ang kamatayon ni Fr. Alexander Salve sulod sa usa ka pension house sa may down town area ning dakbayan sa Sugbo.
Ang episcopal vicar sa Archdiocese of Cebu nga si Msgr. Esteban Binghay mismo maoy miangkon nga ang mga sirkumstansiya sa kamatayon ni Padre Salve labihan ka eskandaloso.
Una ug dakong pangutana, nag-unsa man siya sulod sa usa ka hotel ug kinsa man ang duha ka mga batan-ong babaye nga maoy mipahibawo sa gwardiya sa Pacific Tourist Inn nga giatake siya sa kasing-kasing sulod sa iyang lawak?
Ikaduha, nganong nangalyas man sa iyang ngalan ug wala motug-an sa iyang tinuod nga address ang pari kun wa siya'y malisya ug buot tipigan sa iyang pagsulod sa maong dapit?
Hangtud nga dili matubag ang maong mga pangutana lisod tuohan ang pamahayag ni Arsobispo Ricardo Cardinal Vidal nga igo lang mipahuway si Padre Salve tungod sa kakapoy gikan sa iyang pagpamunyag didto sa barangay Tisa.
Nakasabot ko nga gusto lang panalipdan sa simbahan ang makauuwaw nga hitabo apan wala tingali kinahanglana nga lakip si Cardinal Vidal mohimo sa pagpamakak aron lang tabunan ang eskandalo.
Igo na nga mohangyo siya sa mga sakop sa media nga dili nalang ugkaton kun nag-unsa si Padre Salve sulod sa hotel ug kun kinsay iyang kauban sulod sa iyang lawak tungod kay patay na siya ug dili na siya makapanalipod sa iyang kaugalingon.
Apan ang pag-ingon sa Cardinal nga si Padre Salve igo lang mipahuway sa maong hotel dihang namatay ni alang nako nagpakita sa laing batasan sa pagkakonsintidor sa atong Cardinal.
Nganong naka-ingon man siyang igo lang mipahuway ang namatay nga pari? Ngano nananghid niya sa wala pa mosulod sa hotel? Iya bang gitugotan nga mogamit ni og alyas?
Kun pahuway maoy tuyo sa pari didto sa hotel dili ba layo ra kaayo ug tuyoon ang maong dapit aron siya mahiabot didto? Kun gikan siya sa Tisa kay nagbunyag, mas duol tingali ang pagpauli sa kumbento didto sa Pardo diin siya madistino aron siya mopahuway. Inay nga ipatigbabaw ang iyang pagkakonsintidor mas maayo tingali nga angkunon sa Arsobispo nga silang mga sakop sa simbahan mga tawo lang sab nga posibling makasala. Mas maayo nga iyang pahinumduman ang kaparian sa pagkinabuhi nga ligdong ug limpiyo. Dili ni unang higayon nga gipakita ni Cardinal Vidal ang iyang pagkakonsintidor ngadto sa kaparian.
Nahinumdom ko sa kaso sa pari nga nanghinol sa mga tinun-an sa Abellana National School samtang nagpakumpisal. Dili ba labihan man nga nakadupa sa simbahan sa pari nga lakip ang pangalan ug assignment niini ilang gitapigan gikan sa media?
Unsaon man paghunong sa mga hiwi nga binuhatan sa ubang badlongon nga mga pari kun mismong ang cardinal maoy manalipod nila matag higayon nga dunay mahimong bulilyaso.
* * *