Mga kawani namolitika

Naminaw ko sa interview sa The Freeman kang Lapu-lapu City mayoralty candidate Paz Radaza kaniadtong Huwebes sa hapon. Unang higayon pa kadto nga nakita g’yod nako siya sa personal.

Nakadayeg ko sa iyang tinubagan sa mga pangutana sa mga sakop sa The Freeman editorial team. Tan-aw nako angayan g’yod siya nga himoong mayor sa maong dakbayan.

Dili hinuon ko makabotar kaniya apan midayeg ko sa iyang mga plano kun mapili siya nga mayor. Ang rason tingali niini mao nga kapitan man god siya karon sa barangay Mactan mao nga suheto na siya sa panerbisyo.

Natan-aw usab nako nga siya mahigalaon nga pagkatawo. Gisaad ni Radaza nga kun siya mahimong mayor, bukas siya sa kanunay’ng interview sa mga sakop sa media, sama ni Mayor Tomas Osmeña dinhi sa Sugbo.

Bitaw maghisgut man g’yod ta og interview sa media, gikinahanglan g’yod kini aron nga ang katawhan masayod unsay mga proyekto ug baruganan sa isyu sa mga elected officials.

Dili ra kay ang mga elected officials ra maoy dunay katungod pagtubag sa pangutana sa mga sakop sa media kun dili apil na kadtong mga sinweldohan sa kwarta nga gikan sa buhis sa katawhan.

* * *

Nakabantay g’yod ko nga daghang mga kawani sa City Hall nga nag-uban-uban sa mga kandidato sa pagpangampanya sa lainlaing barangay sa matag gabii.

Sa matag higayon nga mo-cover ko sa mga pulong-pulong, makita nako ang maong mga kawani sa City Hall. Mga kawani sila sa konsehal nga nagpasubli sa katungdanan.

Mikonpirmar ra kini sa pamahayag ni Vice Mayor Michael Rama, pilionon sa pagka mayor ubos sa Bando Osmeña Pundok-Kauswagan (BOPK) nga duna g’yoy mga kawani nga morisgo sa ilang trabaho.

Nakasabot ko kay maninguha man g’yod na sila nga makadaug ang ilang “agawon” aron sila magpabilin sa katungdanan. Kun seryoso ang kaatbang nila nga kandidato, paspasi pagkuha ang mga ebidensya.

Si magpapatigayon Jonathan “Atan” Guardo nga milansar pagka kongresista diha sa south district maoy mibulgar niining maong isyu. Ambot og nakakuha na ba kaha siya og ebidensya nga magamit pagpasaka’g kaso.

* * *

Alang nako, dakung sayop ug makauuwaw ang paggamit og mga kawani sa kagamhanan sa kalihukan sa pamolitika sa usa ka kandidato.

Sa dakbayan sa Sugbo, nakabantay tinuod ko nga kadtong mga kawani kaniadto nga giingon nakong mga walay trabaho kay anha ra manigarilyo sa lobby sa City Hall, naglihok diay sa kandidatura ni Mike.

Sila maoy moasikaso sa mga “venue” sa pulong-pulong inigka-gabii. Ang maong trabaho dili angay nga sweldohan og kwarta nga gikan sa panudlanan sa dakbayan.

Klaro man kaayo sa report sa usa ka pamantalaan kaniadtong Huwebes nga ang personnel department sa City Hall mimatuod nga ang pipila ka ngalan nga gibutyag ni Guardo mga kawani sa dakbayan.

Daghan pa man gani nga mga kawani sa City Hall nga wala maapil sa lista ni Guardo. Ang ako mao nga hunongon na unta nila ang ilang dili maayong buhat.

Sama god ni Gerry Marquez, consultant ra hinoon kini siya sa urban poor nga sa ato pa walay “employee-employer relationship.” Apan usa siya sa mga emcee sa mga pulong-pulong.

Panahon sa adlaw, pito ka kawani sa City Hall ang pirmi nga mag-kuyog-kuyog aning Marquez nga wala g’yoy klaro nga trabaho. Mas maayo pa unta og gigamit sila sa mga clearing operations sa aseras kay mahapsay pa ang dakbayan. Ang kataw-anan kay ang mga tawo nga nagkuyog-kuyog aning Marquez dili na motagad nako human nga gihisgotan nako ang ilang isyu. Porbida.