Gitamparos og kasaba sa Sandiganbayan second division ang Ombudsman tungod sa dinali-dali ug dili makiangayon nga pagpasaka og kaso batok sa mga nalambigit sa kontrobersiyal nga decorative lampposts.
Sa pagbasura sa motion for reconsideration nga giduso sa prosecution ug Ombudsman sa unang hukom sa Sandiganbayan nga nagbasura sa kaso nga gipasaka batok sa mga opisyal sa Department of Public Works and Highways ug dakbayan sa Mandaue giingon niini nga ang pagbakwi sa Ombudsman sa mga kaso nga ilang gipasaka tungod sa kahuyang sa mga basihanan ug ebidensiya nagpamatood lamang nga hasty ug unjudicious ang gihimo sa Ombudsman sa kaso sa lampposts.
Porbidang luoya tawon ni kanhi Mandaue City Mayor Teddy Ouano nabiktima diay siya sa katanga ug dinali-dali nga trabaho sa buhatan sa Ombudsman Visayas. Sayonan mo niana nga naparot ang mga Ouano tungod lang sa decorative lampposts? Unya bakwion ra diay sa Ombudsman ang kaso nga gipasaka tungod kay way igong ebidensiya. Pero wa na! Humana ang piniliay, napildi na si Jonky Ouano, anak ni Teddy nga nagpapili pagka mayor sa dakbayan sa Mandue tungod sa kontrobersiyal nga lampposts.
Kun akoy Teddy Ouano akong ikiha ang mga investigators ug mga opisyal sa Ombudsman tungod sa pagguba ug pagpakauwaw sa akong pangalan. Tungod sa kapalpak sa buhatan sa Ombudsman.
Murag miduyog na ni Teddy ang kahigayonan ug kahitas-an tungod kay aduna koy nasagap nga balita nga mangayo na usab kaniya og pasaylo ang usa ka komentarista sa radyo kaniadto nga mipakauwaw usab sa iyang pangalan. Kun kanus-a kini mahitabo, atong atngan.