Si Tomas ug ang pagduda

Dili dautan ang pagduda. Gani, gikinahanglan man usab kini aron mamahimong mas matugkad nato ang kamatuoran sa mga butang. Si Tomas ang gitawag nga madudahon sanglit wala man siya motuo diha-diha nga nabanhaw ang Ginoo apan sa dihang siya nakahikap na sa mga samad siya nakatuwaw: Ginoo ko ug Dios ko!" Hinuon ang iyang gihimo wala man magpasabot nga wala siya magtuo sa Nabanhaw'ng Ginoo, buot lang niya nga makatino niini. Mao nga alang nako dili maayo nga atong hukman si Tomas. Dinhi sa atong kinabuhi labina karong hapit na ang piniliay angay lamang nga atong awaton ang pagkamadudahon ni Tomas. Dili haom nga motuo gilayon kita sa ilang mga pasalig ug mga black propaganda sanglit daghan sa atong mga politiko ang magpasiatab sa ilang kamatinud-anon apan diay sila mga bakakon. Mao nga sa dili pa kamo moboto himoa sa ang inyong kaugalingon nga madudahon.