Gumikan sa ka-advance na karon sa communication ug information, ang katawhan, bisan sa labing suok nga bahin sa nasud, puno na sa kasasyoran. Atong namatikdan nga dili na ignorante sa mga isyo ang katawhan. Maoy hinungdan nga mangatarungan na, mo-ayag na sa mga isyo ang lungsod. Sa ato pa, magbaton nag kaugalingon nga panghunahuna ug kabubut-on. Dili nagsalig kun unsay isulti sa uban, dili na mag-agad kun unsa ang desisyon sa uban.
Mao kini ang nakanindot sa ka-advance na sa mga kahimanan paghatag og kasayoran. Up-to-date na kaayo ang katawhan.
Maoy hinungdan nga ato na gyung ma-exercise ang atong pagka-hari, tungod kay ang ato unyang desisyon, magagikan man sa kaugalingon natong kabubut-on, ug dili gikan sa mga isulti sa mga kandidato ug ilang mga tambulero. Karong eleksyona, atong paningkamotan nga ang atong pagka-hari mao gayuy mo-prevail, ug dili ang kagustoan sa mga politiko. Kinahanglan, nga ang kabubut-on gayud sa lungsod maoy ma-reflected sa resulta sa eleksyon.
Sa ato pa, kay kabubut-on na man sa lungsod, ug kabubut-on na man sa Haring Lungsod maoy nagbuot, kinahanglan wa nay mga reklamo, wa nay mga election protests, kaylagi, dili man ma-kwestiyon ang hukom sa Hari. Hari ang lungsod. Niining tungura karon, kinahanglan kita gyud ang magbuot, dili ang mga kandidato, dili ang mga politiko. Nasayod kita sa mga isyo. Ato kining timbang-timbangon ug ayagon pag-ayo. Dili kita magpadala sa mga komentaryo – ato lang silang paminawon, apan ato gayud ang hukom. Kita guy hari.
Apan, mahinungdanon nga dili usab kita ma-bias sa atong paghukom. Usahay ra ba, ma-personal ang atong pagtoki sa mga isyo. Ang uban gani kanato, dili na maminaw sa mga isyo, kay decided na sila. Di sad ni maayo.
Kun maghisgot tag isyo, ato kining i-relate sa nasud. Kalimtan ta ang atong kaugalingon. Kay usahay daghan kaayong mga isyo-nasyonal nga mahisupak sa personal natong kagustoan. Di sad ni maayo. Makadaut kini sa atong pagka-hari.
Daku ug bug-at ang mga suliran nga gipas-an karon sa atong nasud. Kinahanglan atong timbang-timbangon pag-ayo kun kinsa kanila ang makasugakod pagbuntog sa maong mga suliran. Dili kini madalag hilak-hilak, pabuhagay sa mga luha.
Niining tungura, dili emotion maoy atong ipatigbabaw, kundili, utok. Sa unang mga panahon, ugdang kaayo ang desisyon sa mga hari. Gitamod ug gitahod sa mga subjects, bisan gani, sakit alang kanila.
Mao nga karong Mayo 10, atong ipakanaug ang hukom sa Haring Lungsod. Hukom nga dili pinalit, ug dili tinikasan. Kun magpapalit lang gihapon ang Haring Lungsod karon, unsa kahay dangatan sa atong nasud? Sakit paminawon kun ang makaingon sa pagkaguba ug pagkahugno sa atong nasud, mao ang Haring Lungsod mismo. Pagka-wa gyud natoy hinungdan nga pagka-hari!