Mga kandidatong way campaign posters

Ang scholarship program sa dakbayan sa Sugbo daku kaayo og matabang sa kandidatora sa mga kandidato sa Bando Osmeña Pundok-Kauswagan (BOPK).

Ang mga ginikanan sa kabataan nga gipanghatagan og scholarship voucher nga tag P10,000 daku na kaayo og posibilidad nga adto mosuporta kanila sa adlaw sa eleksyon.

Gawas ana, gipakapinan pa g’yod og duha ka T-shirts nga may marka nga “I’m a scholar.” Pagakpak lagi ang mga ginikanan sa kabataan nga naminaw sa pakigpulong nila ni Mayor Tomas Osmeña ug ni Joy Augustus Young.

Dunay mga ginikanan nga didto sa Cebu City National Science High School nga nangutana kanako kabahin sa scholarship program sa mayor apan wala nako sila matubag kay pagaw ko.

Kining paghatag og scholarship sa dakbayan diskutihonon pa g’yod hinoon kini pag-ayo sa konseho kabahin sa mga lagda sa pagpatuman sa programa.

Si Young, nga kandidato pagka bise mayor sa BOPK maoy mibatbat pag-ayo sa scholarship program. Makapahimo kini kaniya nga humot ngadto sa mga botante.

* * *

Nagkaduol na g’yod ang eleksyon apan daghan pa kaayong mga kandidato nga wala ra g’yoy gihimo. Wala gani magpahimo og campaign materials bisan sako na lang sa bugas.

Tan-aw nako, angay tingali nga butangan og mga limitasyon alang niadtong matugotan nga maka-file og certificates of candidacy kay kun mao kini, maghugaw-hugaw ra sa balota kining mga tawhana.

Gawas nga dili g’yod makadaug, wala pa g’yod mohimo og pagpangampanya. Milansar ra sila isip mga independente nga kandidato unya wala mangampanya.

Mas maayo pa ang akong higala nga si Greg Dealagdon kay bisan og siya independente nga kandidato pagka mayor sa Aloguinsan apan mitinuod gayod sa pagpangampanya.

May mitug-an nako nga paborito ra ba kuno si Greg sa mga botante sa ilang lungsod ilabi na sa mga mag-uuma.

Si Rico Palcuto nga kandidato pagka bise mayor dinhi sa dakbayan mipakatap usab og mga campaign posters. Si Francisco Ashley Acedillo nangampanya g’yod sa iyang kandidatura pagka kongresista sa north district.

Ingon niini ang akong gusto nga bisan og independente mohimo g’yod og pagpangampanya. Baya na man kanang uban diha nga ang tuyo tingali mao ra ang paghugaw-hugaw sa balota sa ilang ngalan.

* * *

Kagabii, nakigkita nako ang mga senior citizens nga taga barangay San Roque (Ciudad) kay duna sila’y gireklamo kabahin gihapon sa mga kwestyonable nga transaksyon sa ilang barangay.

Sila si Kapitan Roger Ruizo ug ang iyang kawani sa barangay nga gitoohan nga naghimo niining maong mga binuang miingon nga adto ra sila motubag niini sa Ombudsman.

Aw inyo ang katungod sa pagpakahilom. Apan alang nako nganong lisud man tubagon kun wala kay sala?

Ang nakadaut ra g’yod no kay ang kawani sa San Roque nga gitudlo nga Gender and Development (GAD) focal person wala may sweldo sa barangay.

“Per project” siya mao nga makatoo ko nga mangita g’yod sila og paagi aron makakuha og bahin sa budget nga gitagana sa maong proyekto.

Kun dili man gani tinuod kining pagduda sa kadaghanan, aw ipasabot sa Ombudsman kun ngano nga hasta ang mga patay giapil ninyo sa lista.

Unya inyo pa nga gibutang nga miapil og kaon ang patay sa giandam ninyo nga pagkaon. Grabeha uy!

Dili pa nako ikabutyag ang inpormasyon nga nakuha nako gikan sa mga senior citizens nga nakigtagbo nako.