EDITORYAL - Laing pagsulay

Lain na usab nga pagsulay ang giatubang sa administrasyong Arroyo ang kamatayon ni Sandiganbayan presiding justice Norberto Geraldez kinsa namatay niadtong Domingo tungod sa pancreatic cancer complications.

Ang tigpamaba sa Korte Suprema nga si Midas Marquez nagkanayon nga ang desisyon sa labing taas nga korte sa nasud nga nagtugot kang Pres. Gloria Arroyo pag-appoint og bag-ong Chief Justice hulip kang Reynato Puno nga moretiro sa Mayo 17, 2010, wala maglakip sa ubang appointment sa hudikatura.

Apan ang Malacañang miinsister gyud nga ang 60 ka adlaw nga constitutional ban sa midnight appointments wala maglakip sa hudikatura.

Sama sa katapusang baruganan sa Banat News, ang maayong pamatasan na lamang ang atong gipaabot gikan kang Pres. Arroyo.

Angay siyang magbaton og kaulaw nga hapit tanang sektor sa katilingban misupak niini tungod sa pagtuo nga nahasupak kini sa maayong pamatasan sa pamuno-nasud kang kansang gahum mapupos na sa Hunyo 30, 2010.

Tan-awon nato kun mo-uyon ba si Pres. Arroyo sa panglantaw sa kinabag-an, o mopugos siya pagsupak sa mga Pilipino alang sa kaugalingon niyang interes.