Pangampanya g'yod mo!

Angay g’yod unta nga kadtong mga kandidato alang sa lain-laing posisyon sa kagamhanan nga walay posibilidad nga modaug sa eleksyon, tangtangon na lang g’yod sa listahan.

Magsamok-samok ra man god ang ilang ngalan diha sa balota. Kadaghan diha sa mga kandidato nga klaro kaayo nga nagsamok-samok ra. Maayo unta kadto og miapil sila sa pagpangampanya, apan wala man g’yod.

Napulo’g usa (11) god ka kandidato pagka mayor dinhi sa dakbayan, unya tulo man tingali kadto sa pagka bise mayor, unya lima pagka kongresista sa north district, duna say susama nga gidaghanon sa south district.

Tiaw mo, kami gani nga mga sakop sa media wala makamemoreya kinsa kini sila. Unsaon, kining maong mga kandidato wala man mangampanya.

Ang kalipay tingali niining maong mga kandidato nga ang ilang ngalan maapil ra sa balota. Pagka konsehal, kapin sa 60 ang mi-file sa ilang certificates of candidacy dinhi sa dakbayan sa Sugbo.

Ang tinuod, ang mga sakop ra sa Bando Osmeña Pundok-Kauswagan (BOPK) ug Kugi Uswag Sugbo (Kusug) maoy aktibo nga nangampanya. Apan kanang uban diha, ambot, nasayod na tingali sila nga pilde g’yod.

Kay mi-file man g’yod kamo sa inyong COC, pangampanya g’yod. Sunda god ninyo si Ermita barangay captain Felicisimo “Emok” Rupinta nga milansar pagka independente nga konsehal sa dakbayan sa Sugbo, nangampanya g’yod.

Si Ashley Acedillo nga milansar pagka kongresista sa north district, bisan og nasayod nga lig-on ang iyang kontra nga si Cutie del Mar, walay hunong sa pagpangampanya.

Kana maoy tinuod nga kandidato, dili sama anang uban diha nga nagtoo nga ang paglansar kutob ra sa pag-file sa COC.

Angkunon hinoon nako nga kapoyan ko nga mo-interview sa mga kandidato nga sigurado na nga dili g’yod modaug. Moingon ko nga sigurado nga dili sila modaug kay wala man mangampanya.

Ayaw ko’g ingna nga ang media ra maoy makapahimo kanila nga mainila sa mga botante. Dili kini makiangayon niadtong ubang kandidato nga sa sayong buntag mohimo og pagpanglamano, unya pulong-pulong sa gabii.

Sunda god ninyo si Jonathan “Atan” Guardo, bisan og ilado na kaayo sa south district, apan walay hunong sa pagpangampanya pagka kongresista.

Lain-lain ang gimmick sa mga kandidato, dunay mosayaw kanila sa dayon na nilang paila aron mosulti samtang ipatugtog ang ilang jingles. Dunay uban nga mohimo’g komedya.

Apan gusto g’yod unta ko nga maminaw ni Atty. Sisinio Andales, ang kapitan sa Pahina Central nga milansar pagka konsehal, kay mobalak kuno kini human sa iyang pakigpulong.

Daghan kuno sa makadungog sa garay ni Andales ang manglimbawot ang balhibo. Duna man go’y mga botante nga dili makalimot sa mga tawo nga mosayaw, mokanta ug mohimo’g bisan unsa nga dili nila makalimtan.

* * *

Nalipay ko kay gisultihan kong Konsehal Allan Majait nga diri sa Upper barangay Apas makabaton na unya kami og direkta nga tubig. Pagkanindot kay makapahuway na unya kami sa mahal kaayong tubig.

Ang Abejo Builders mao may gi-hire sa MCWD nga mangita’g tinubdan sa tubig diri sa barangay Apas. Dia na man god tawon ko magpuyo sa bukid mao nga kay mipugos man ko nga makabaton og koneksyon, mahal kaayo ang akong tubig.

Nindot kini nga balita. Maayo unta og ang barangay Apas ubos ni Kapitan Ramil Ayuman mohimo og paagi nga mapadali kining maong proyekto alang sa mga lumulopyo sa barangay.