Magpalain ta. Pasagdan ta lang una ang politika. Pagkakaron, di lang una ko magtagad kun kinsay mag-una sa survey, kinsay tinuod nga hindi magnakaw, kinsay tinuod nga nahigugma sa mga kabus ug sa kabataan, kinsay natawong pobre, ug kinsay nagpunay og sangpit sa mga patay. Di lang una ta manghilabot nila.
Ari tang Nora Aunor. Nganong Nora Aunor man gyud ? Nganong di man si Kris Aquino o Korina Sanchez ? Nganong di man sad si Ruffa Gutierrez o si Boy Abunda?
Si Nora Aunor, tungod kay dugay na siyang nawala sa limelight, ug giingon nga mouli siya nganhi sa Pilipinas ug mobalik paglingaw kanato.
Nganong Nora man gyud? Kahinumdom ko pagsikat ni Nora Aunor, both in the acting and singing fields, mga tuig 1964 kadto, didto ko sa Cagayan de Oro, nag-eskwela sa Xavier University. Ug tungod kay si Lorie, akong brother, manager man sa RMN-dxCC, nag-parttime ko sa news department, ug akong nakauban si Ven Macaldo, scriptwriter ug director sa mga drama.
Kahinumdom ko nga sikat kaayo si Nora. Daghan kaayong mga Noranian sa Cagayan de Oro, ug wa pa igdungog si Vilma. Ug aron maalegre, gitukod ni Ven ang Vilmanian Club sa Cagayan de Oro, naghimo mig mga gimmick aron molig-on ang mga Vilmanian.
Ug tuod man, naka-put up gyud og competition ang mga Vilmanian. Niadtong tungura, among nakita nga sa pag-kanta, mas maayo gyud si Nora, apan sa acting, mas maayo si Vilma. Ug mao kini ang nahitabo sa mosunod nga katuigan. Dungan silang misikat – apan, gumikan sa pipila ka panghitabo, nawala si Nora, ug nagpadayon ang paglampos ni Vilma, hangtud nga hapit na hinoon ma-kandidato pagka-bise presidente sa nasud.
In the meantime, si Nestor Torre sa Inquirer, mibutyag nga daghang mga fans ni Nora ang kontak kaniya, excited kono kaayo, pagkahibawo nga mouli si Nora ug mobalik sa entertainment world.
Kanus-a man ni? Wala pay hingpit nga kasayoran. Lagmit, mopahigayon siyag konsiyerto, una siya mobalik sa puting tabil. Labing seguro, daghan pang mga Noranian nga nagpaabot sa iyang pagbalik nganhi sa Pilipinas.
Of course, dili na mahisama sa mga bata pa sila nga magkaatbang ang mga Noranian vs. Vilmanian. Gani, duna may mga sugyot nga mag-uban sila si Vilma sa usa ka salida sa sine.
Unsa ka man, Dro, Noranian ka ba ?