Angayan sumpoon sa kapolisan ang kamatay

Kaniadto ang pirming magkaengkwentro nga moresulta sa kamatayon sa masigkahabig mao ang Tau Gamma ug Akrho.

Karon, taudtaod na nga wala sila mosalida sa esena. Ang sige ug kanunay na sab nga mosalida karong panahona mao ang gang nga 'Bloods' ug 'Crips'.

Karong bag-o pa lang, duha gyod ang gikatahong nangamatay nga pulos batan-on pa ang pangidaron diha sa Villagonzalo ning dakbayan ug ang rason mao ra gyod ang gang war.

Unya sa pagkasunod adlaw, gipaarakan sa mga armas ang nanagbilar sa nahisgotang dapit.

Sa Cogon, Pardo usab, usa ka batan-on nga ginganlan og Jerry Jakosalem ang gipusil-patay samtang nagpahulay. Nakadagan pa unta ang biktima apan giusban pa gyod hangtod sa iyang kamatayon.

Daghan na ang nangamatay gumikan lang sa gang war. Apan ang atong kapolisan igo lang nga moingon nga imbestigahon pa gyod nila ang kaso.

Kinahanglan, mangita og mga maayong pamaagi ang atong mga kapolisan nga masumpo sa hingpit ang mga 'gang war' diin kamatayon sa linghod pang panuigon ang resulta niini.

Ang gang war mahitabo sa takna sa kagabhion og kaadlawon diin ang kasagarang mga sakop niini mga 'high' na kaayo sa ginadiling drugas.

Pangitaan gyod og epektibong solusyon sa atong mga kapolisan ug mga opisyales sa atong kagamhanan nga masumpo ug mahunong na sa hingpit ang gang war tali sa Bloods ug Crips.

Kun dili kini masumpo sa madaling panahon, siguro gyod nga mangahurot na unya ang atong mga batan-on gumikan sa kamatay sa armas ug mangaigo na unya ang mga walay labot sa saag nga mga bala.

Dako'g ikatampo niini ang mga ginikanan kay mamonitor man nila ang kalihokan kon mga movements sa ilang mga anak!

Di ba husto?