Ang surambaw ni Pangulong Arroyo

Samtang daghan og gibuhat sa iyang pagka Vice Chairman sa Dangerous Drugs Board si Atty. Paul Oaminal kay gusto niining mahatagan og kasulbaran ang suliran sa ginadiling drugas. Samtang nahadiin-diin na lamang og naabtan sa gawas ug sa tibook nasud aron kombatihon ang mga nagpayuhot sa ginadiling drugas pinasubay sa balaud ug samtang nakig atubang sa mga mag-uuma nga namalhin na sa pagpananum og marijuana aron agnihon ug danihon sa pag- undang sa maong buhat pinaagi sa pag-awhag kanila sa pagpananum na lamang og mga abaca, lahi ang iyang naani. Gitang-tang siya ni pangulong Gloria Macapagal Arroyo sa katungdanan.

Katingad-an ang pagkatang-tang ni Atty. Paul Oaminal sa iyang katungdanan. Hangtod karon wa pa gyod mohatag ang Malakanyang sa rason kun nganong gihulipan ang abogadong aktibo sa pagpakigkombati sa suliran sa ginadiling drugas. Daghan ang nakalitan sa hukom ni Pangulong Arroyo pagtang-tang sa abogado.

Ang kanhi Chairman sa Dangerous Drugs Board nga si Tito Sotto wa makauyon sa pagtang-tang kang Oaminal. Gianugnan usab ang mga police ug prosecutors nga gikauban sa abogado sa pagpakigkumbati batok sa suliran sa ginadiling drugas ingon man ang mga sakop sa media nga kanunay nga nagsunod sa kalihukan sa Dangerous Drugs Board.

Pagka dili masabot. Ngano ug unsa kahay nasulod sa utok sa pangulo nga giilisan man ang iyang kalihim nga dako na og gikatabang sa kampanya batok sa ginadiling drugas? Sa iyang pagka-aktibo sa kampanya batok sa ginadiling drugas ako nagtuo nga si Atty. Paul Oaminal na ang ipuli ni Tito Sotto sa pagka Chairman sa Dangerous Drugs Board apan unsa bang pagka unsaa nga gitang-tang man hinoon siya sa iyang katungdanan! Surambaw ang gihimo sa pangulo. Inay kay iyang pasidunggan ug i-promote, iya hinoong gitang-tang si Atty. Paul Oaminal.

Tinood, prerogative sa pangulo ang pagtudlo ug pagtang-tang sa mga opisyal sa iyang kagamhanan pero ang pagtang-tang sa katungdanan sa usa ka opisyal nga wa magpuyo ug wa magpasinaw sa iyang lingkoranan usa ka pag- abuso sa prerogative nga gahum sa pangulo!