Makapaduda, makapabalaka

Unsa naman ni uy! Makaduda na og maayo kining mga linihukan ni Presidente Gloria Macapagal Arroyo. Tiunay ba kaha ang pamahayag niya dihang miadto siya sa Pampanga pipila ka bulan na ang nakalabay nga mokanaog siya sa pwesto ug ipasa sa bag-ong mapiling presidente ang renda sa gobiyerno?

Una, nganong midagan paman siya og balik sa pagka-kongresista sa Pampanga? Dili ba ang pagka-presidente sa nasud maoy labing taas nga posisyon nga mahimong maangkon sa usa ka tawo? Unsa ba ni kahakog sa gahum o duna siya’y gikahadlukan?

Ikaduha, bisan paman sa mga tagawtaw sa mga kritiko ug ilabi na sa pipila ka miyembro sa militar gitudlo gihapon ni Arroyo si General Delfin Bangit pagka Chief of Staff sa Armed Forces of the Philippines. Si Bangit sumala pa sa mga kritiko “Yes Man” sa administrasyon.

Hinuon si Bangit nga sakop sa PMA Makatarungan (1978) Class mipasalig nga iyang ipatigbabaw ang Konstitusyon ug dili magpagamit sa mga politiko, apan di kalikayang makaduda ang pagkatudlo kaniya sanglit kanhi kumander siya sa Presidential Security Group ni Arroyo.

Ikatulo, kini karong ‘midnight appointment’ nga posibleng buhaton ni Arroyo diha sa Supreme Court tungod kay midesisyon na ang SC nga mahimo siyang makatudlo og bag-ong justices, bisan gikwestyon sa mga walay kumpiyansa sa presidente.

Unsa kahay mga implikasyon niini ilabi na sa katalandugon pa sa kahimtang sa umaabot nga labing unang automated polls karong Mayo?

Ang SC maoy katapusang tigpatin-aw kanato sa atong mga balaod. Dili kalikayan nga ang mga kritiko ni Arroyo magdudang ini’g panahon unya may failure of elections, ang desisyong manggawas sa SC adto unya mopabor sa administrasyon.

Kining ato pangagpas lang, mahimong matinuod ug mahimong dili. Una, si Arroyo midagan pagka-kongresista sa rason nga pagbuot kini sa iyang mga kababayan ug labaw sa tanan ang pagpadayon sa iyang serbisyo sa katawhan.

Sa akong tan-aw posibleng nahadlok si Arroyo sa mga bahad sa mga kritiko nga ikiha tungod sa mga kahiwiang nahitabo atol sa iyang pagdumala sa nasud maong modagan kini og balik. Kun makadaog, dili imposibleng dili siya labanan sa mga kaubanang kongresista.

Atong hinumduman nga mayoriya sa Kongreso iya ni Arroyo. Ikaduha, kung dunay failure of elections, awtomatikong ang Kongreso maoy motudlo og temporaryong modumala sa renda sa gobiyerno samtang hikayon pa ang pagpahigayon og laing eleksyon, kini kun walay mahitabong military takeover.

Kinsa pamay ilang itudlong caretaker? Alangan man pud si Rep.Satur Ocampo, nga dili man kini maoy mibubo og mga pundo (kwarta) sa mga proyekto (pet projects) diha ilang mga distrito. Dili ba si Arroyo?

Ikatulo, kun mahitabo mang mo-takeover ang militar ug si Bangit maoy modumala, unsa kahay mahitabo?

Ang binilanggong si Brig. Gen. Danilo Lim nabalakang dunay mahitabong kagubot unya diha mismo sulod sa militar kun kini mahitabo.

Unta hinuktukan ni Arroyo ang iyang gipanghimo karon nga misabwag og mga kadudahang senyales. Mas angayang hatagan og gibug-aton ang dangatan sa mga Pilipino ilabi na sa sunod nga henerasyon.

Pagkamakaluluoy na usab sa Pilipinas kun dunay mahitabong ingon niini kadakong kasamok. Mamiya ang mga investors, momenus ang bili sa peso, mosiaw ang kriminalidad, modaghan ang kaso sa paglapas sa tawhanong katungod ug uban pa. Nakalimot na ba kita sa bunga sa Martial Law? Ang mga nagsunod nga military coup? Hangtud karon gipamati pa nato ang epekto niini bisan pipila na ka tuig ang nanglabay. Karon duna na puy lain?