Lain na usab nga kaso may kalambigitan sa decorative lamp posts ang gibasura sa Sandiganbayan kini tungod sa kahuyang sa mga ebidensiya nga gipresentar sa Ombudsman nga maoy nag-prosecute sa kaso.
Ang decorative lampposts nga kaso nahimong init nga isyu sa milabay nga lokal nga piniliay dinhi sa isla sa Sugbo tungod sa giingong gipaburot nga prisyo niini. Mao kini ang hinungdan kun nganong nahugno ug naparot sa politika ang mga Ouano sa dakbayan sa Mandaue. Gani mao kini ang hinungdan kun nganong wa mopakita sa publiko sulod sa tulo ka tuig si kanhi Mandaue City Mayor Teddy Ouano.
Apan karon hinay-hinay na nga mipabor ngadto sa mga Ouano ang mga hukom sa Sandiganbayan. Sa upat ka mga kaso nga iyang giatubang usa na lang niini ang nahabilin tungod kay ang tulo gipangbakwi mismo sa Ombudsman nga maoy nagpasaka tungod sa kakulang sa mga ebidensiya. Ug ang nahabilin nga kaso sa akong tan-aw (di pa man ko abogado) mabasura gihapon tungod sa rason nga ang proyekto iya sa nasudnong kagamhanan ug walay labot sa kontrata ang lokal nga kagamhanan nga gidumala ni Teddy Ouano kaniadto.
Kahibawo mo kining Ombudsman Visayas dili makiangayon, dili makatarunganon, hinoon makalibog. Ang lampposts gikontrata sa Department of Public Works and Highways kay proyekto sa nasudnong kagamhanan, gani mao kini ang mipahigayon sa bidding ngadto sa mga supplier sa proyekto pero ang nahitabo, ang lokal nga kagamhanan mao ang gilutos sa Ombudsman. Wa apila sa pagpasaka og kaso sa Ombudsman si Secretary Hermogenes Ebdane sa Department of Public Works and Highways nga maoy nagkontrolar sa proyekto. Di tan-awa, gipangbasura na ang kaso nga gipangpasaka! Pagka dili masabot.
Ako nagtoo nga ang sunod nga hukom sa Sandiganbayan maglimpyo na upod unya sa pangalan ni kanhi Mandaue City Mayor Teddy Ouano. Pero ulahi na tungod kay giguba na ang iyang pangalan. Hinoon puwede pa si Teddy nga mobangon ug mamapha sa lapok nga gipapilit sa Ombudsman sa iyang tuhod.
Bangon Mayor Teddy ug pangibta unya pas-ana ug idagan nang nahabiling lampposts nga nagbarog ngadto sa buhatan sa Ombudsman ug ibunal sa ilang atubangan.