Gipugngan sa korte ang gitakdang plebisito karong Sabado alang sa katukuran sa bag-ong barangay gikan sa mga sityo sa Guadalupe. Si Judge Gabriel Ingles sa Regional Trial Court Branch 58 miluwat og temporary restraining order sulod sa 20 ka adlaw nga nagpugong sa Commission on Elections pagpahigayon sa plebisito.
Si Ingles nakumbinsir nga dunay igo nga basihanan ang petition for prohibition nga gisang-at sa konsehal sa Labangon nga si Victor Buendia human ma establisar sa naulahi nga ang pagpahigayon sa plebisito makalapas sa iyang batakang katungod pagbotar.
Si Buendia isip konsehal sa Labangon dili makasalmot sa plebisito sanglit dili man siya rehistrado nga botante sa Guadalupe kini bisan og ang iyang pinuy-anan diha sa Rosalina Village gilakip sa mga sityo nga maglangkob sa bag-ong barangay Banawa-Ingles sigun sa gimbut-an sa Republic Act 9905.
Gawas ni Buendia ang iyang mga silingan nga tua sab marehistro sa Labangon gipaabot nga ma-disenfranchise. Kini maoy bug-at nga rason nganong gitugot ni Ingles ang temporary restraining order.
Ang amahan sa balaud nga nagmando sa katukuran sa Banawa-Ingles isip buwag nga barangay sa Guadalupe nga si Kongresista Antonio Cuenco mikwestiyon sa hurisdiksiyon sa korte. Matud ni Cuenco nga moduso sila og motion for reconsideration ug awhagon ang korte paglibkas sa TRO.
Rason ni Cuenco mao nga si Ingles way jurisdiction sa paghusay sa maong kaso sanglit ang respondent niini mao ang Comelec. Gipasabot ni Cuenco nga ang Comelec sama og level sa Court of Appeals busa ang Korte Suprema maoy dunay jurisdiction.
Si Cuenco miingon nga si Buendia wa say legal personality nga moduso sa reklamo sanglit wa man siya magrepresentar sa barangay. Gawas pa matud ni Cuenco nga mahulagway nga na-estopel kon wa nay bili ang reklamo sanglit napasar na ang balaud.
Si Cuenco nagkanayon nga kaniadto unta dihang gidiskutir pa ang balaud sa kongreso nisang-at og reklamo si Buendia. Admitido hinuon si Cuenco nga dunay depekto ang iyang balaud kun ang hisgutan ang punto sa mga molupyo sa mga sityo nga nalakip sa bag-ong barangay apan tua marehistro sa Labangon.
Apan sumala pa ni Cuenco nga dili ni igong rason aron pugngan ang plebisito.Matud niya nga angayang idayon ang plebisito ug amendahan ang balaud human sa resulta sa plebisito.
Alang nako, sayop ang maong baruganan. Kun imong gamiton ang imong “centido comon” kon common sense dili makiangayon nga imong ihinayon ang plebisito bisan wala pa makorehi-i ang depekto sa balaud.
Mahulog nga walay bili ang singgit sa mga taga Rosalina Village nga tugotan silang makaapil sa plebisito kun ato ning himuon kay tataw man nga ang makabotar lang mao ang rehistrado sa Guadalupe.
Unsa may mahitabo niadtong tua sa Labangon narehistro apan nahisakop sa bag-ong barangay? Dili madungog ang ilang sentimento pinaagi sa plebisito.
Dili ba dako ning kalapasan sa ilang tawhanong katungod nga gigarantiyahan sa atong Constitution? Usa sa mga batakang katungod sa matag tawo mao ang “right to suffrage” kon katungod pagbotar.
Ang angayang buhaton ni Cuenco mao ang paghimo una og koreksiyon sa iyang balaud una himoon ang plebisito. Kun gitun-an pa unta niya og maayo ang mga boundary nalikayan unta ang maong problema.
Isip kongresista angayan untang nasayod siya sa sitwasyon diha sa maong dapit labi pa nga gilumotan na siya sa pagpangatungdanan sa maong distrito.
* * *