EDITORYAL - Way politika sa grad rites?

Panahon ron sa gradwasyon sa mga estudyante sa nagkadaiyang mga tulonghaan.

Tungod kay nahitabo nga election season sab karon, daghang mga kandidato ang maninguha nga mamahimong mamumulong sa gitawag nga commencement rites.

OK ra man kini, suma pa ni Education Secretary Jesli Lapus, apan mipahimangno siya. Matud niya ang gradwasyon dili politikanhong kalihukan sa eskuwelahan.

Miawhag siya ngadto sa mga politikong mamumulong nga kun mahimo, maoy hisgutan ang mga butang nga makagiya sa mga mi-gradwar sa pagtultol sa dan padung sa kalamposan.

Kami usab manghinaot nga dili himuon ang graduation rites nga usa ka natad alang sa pagpausbaw sa kandidatura sa mamumulong.