Pamana ni Brother Joe

[Binigkas ng awtor sa Necrological

Service ng Knights of Columbus

Para kay SK Jose R. Baligod, Pebrero 28, 2010]

Luksa ang umagang sa ati’y bumati

Sapagka’t aalis ang taong may uri;

Si Brod Joe R. Baligod na dati’t kalimpi

Tinawag ng Diyos sa langit uuwi!

Itong si Brother Joe ay hindi pa patay

Siya’y nakahiga natutulog lamang;

Kanyang espiritu ay buhay na buhay –

Tayong lahat dito ay pinagmamasdan!

Unang pinagmasda’y ang kanyang asawa

Na sa tuwa’t lungkot ay laging kasama;

Habang niyayakap lumuluha siya –

Ang pagyakap niya’y pamamaalam na!

Nilalapitan din – mga anak apo

At mga kaanak na ngayo’y narito;

Kanyang sinasabing: “Sa aking paglayo

Sa pupuntahan ko tayo’y magtatagpo!”

“Ang KC, Homeowners at Coop na natatag

Ay maglingkod sana sa tao ng tapat;

Malinis ang kwenta, ang pundo ay sapat

Malakas ang tubig – maayos ang lahat!”

“Sa anak at apo – aking iniiwan

Maagang nagtampong lusog ng katawan;

Sa inyo’y alay din ang diwang mayamang

Sa ginhawa’t hirap ay naging marangal!”

“At sa inyong lahat na ngayo’y narito

At mga kaanak na nasa malayo –

Ang aking pamana ay tapat na puso

At saka ang diwang ang pag-asa’y kayo!”

“Umaasa akong sa akig pag-alis –

Ang mantsa ng dusa’y inyong maaalis;

Kung hindi n’yo kaya ako’y magbabalik –

Upang ang ginhawa’y makamit ng Village!”