Patay mitambong og seminar

Dakua sa kaso nga giatubang karon ni Kapitan Roger Ruizo ug sa ubang konsehal niya sa barangay San Roque (Ciudad), ang barangay nga nahimutang dapit sa pantalan sa dakbayan sa Sugbo.

Tiaw mo, nag-atubang sila karon og kutay sa mga kaso didto sa Visayas Ombudsman nga gipasaka ni Konsehal Lidiore “Boy” Miranda, kauban ra nila sa konseho sa barangay.

Sa akong pagtimbang-timbang bug-at ang ubang kaso nga giatubang nila ni Ruizo, ilabi na ang isyu nga matud pa nangangkon sila nga duna sila’y gihimong seminar sa mga tawo nga dunay apan sa panglawas.

Si Konsehal Miranda nangangkon usab nga wala g’yoy seminar nga gihimo ang ilang barangay kaniadtong miaging tuig alang sa mga Persons With Disabilities.

Katoohan usab ang pamahayag ni Konsehal Miranda kay nakapakita siya og kamatuoran pinaagi sa dukomento nga gisumiter sa barangay didto sa Department of Interior and Local Government (DILG).

Misumiter ang barangay San Roque (Ciudad) sa ngalan sa mga PWD nga giingong mitambong sa seminar. Apan napasiga ang mga mata ni Konsehal Miranda kay naapil man ang ngalan ni kanhi Kapitan Telesforo Rabaya.

Si Rabaya namatay kaniadto pang 2004 apan nganong nakatambong pa man siya sa seminar sa miaging tuig? Kalag ba kadto ni Rabaya ang mitambong?

Tungod niini, naikag si Miranda paghimo’g pakisusi. Daghan sa mga PWD, kang kansang ngalan giapil sa lista nga kuno mitambong sa seminar mitataw nga dili tinuod nga sila nakatambong.

Ang isyu god niini mao nga ang gasto sa maong seminar mabulsa ra sa mga mapahimuslanon. Grabeha ani uy! Daghan ang namirma og affidavit nga wala sila sa seminar ug gihimo-himo ra ang ilang pirma.

Kinsa bay naghimo niini? Akong gitawag kagahapon si Kapitan Ruizo ug gipangutana. Abtik nga nanghunaw si Ruizo ug gitumbok ang iyang kawani sa barangay, si Ligaya Britania, nga mao kuno ang naghimo.

Buyno, kun tinuod kini, ayaw na paglangan-langan Capt. Miangkon man kaha si Ligaya kanimo nga nakahimo siya og binuang, nganong hangtud karon gipabilin pa man nimo siya sa serbisyo sa barangay?

Nganong wala man nimo siya ikiha? Naamong na god kamong mga opisyal nga nakapirma kay subra man ang inyong pagsalig kaniya. Aksyoni na dayon ayaw pagsunod sa gihimo kaniadto sa kapitan sa Lorega nga mitapion sa iyang sakop nga nakasala.

Unsa bay gilatid sa balaud. Ang section 85 sa Local Government Code (Preventive suspension of Appointive Local Officials and Employees) nagkanayon.

Ang mga local chief executives makahimo pagbutang sa preventive suspension nga dili molapas sa 60 ka adlaw sa iyang mga ubos nga opisyal ug mga kawani samtang magpadayon ang ilang kaso kun ang kaso naglambigit og dishonesty, oppression, grave misconduct, neglect in the performance of duty, ug dunay basihanan nga ang hingtungdan mamatud-an g’yod nga sad-an.

Kun dili gani makahimo si Kapitan Ruizo pagsuspenso ni Ligaya bisan pa man kun matud pa niya, miangkon na kini sa iyang nahimo sa iya mismong atubangan ug nangayo pa gani’g pasaylo, masabot nga nakigkonsabo ka ug angay ka nga apilon sa kaso.

Bisan pa og ibutang nato nga si Miranda dunay “political motive” pagpasaka niya’g kaso kay kuno gusto kini nga molansar pagka kapitan sa barangay, lahi kini nga punto kay ang reklamo naglambigit og lihitimo nga isyu nga angay’ng tubagon.