AFP 'gisilutan' tungod sa martial law

Niadtong milabay'ng semana, lain na usab OV-10 Bomber sa Philippine Air Force ang nahagsa. Mikalas og duha ka piloto. Mao na kini ang ikaduhang higayon niining tuiga nga nahagsa ang abyon sa PAF ug mikalas sa mga luwan niini.

Dekada 60 ang Pilipinas maoy giisip nga labing ‘powerful’ sa natad sa military dinhi sa South East Asia. Kapin 15 ka tuig human sa ikaduhang gubat sa kalibutan gumikan sa mga nadawat natong surplus war material gikan sa Estados Unidos.

Duna kita kaniadto’y Sabre-86 jet fighters nga wala gani sa ubang kaalyadong nasud sa US ni bisan na sa China, Singapore ug uban pang silingang nasud ug ubang western countries.

Gawas pa niana, duna kitay usa ka squadron nga F8H ug F8P- Crusaders fighter-bombers niadtong dekada 70 hulip sa F-8 Sabres. Apan ang pagbuto sa Mt. Pinatubo maoy mitapos sa maong mga abyon samtang gihipos diha sa mga hangars sa airbases sa Luzon.

Duna usab kita'y eksaktong kagamitan sa military support aircrafts alang sa transportasyon sama sa mga helicopters (Hueys) ug fixed-wing transport planes.

Apan human matapos ang martial law, wala dayon hikalimti sa publiko ang mga pangabuso sa militar bisan paman daghan nang nangaging bag-ong presidente ug paningkamot sa kasundaluhan nga mabalik ang simpatiya ug pagsalig ngadto kanila sa mga tawo.

Ang pagsige og lusad og mga kudeta ug mga pasangil nga kurapsyon sa mga dagkong opisyal diha sa AFP. Usa sa mga mipabuhagay niini diha sa publiko mao ang mismong usa sa mga opisyal nga karon si Senador Antonio Trillanes.

Makita kini mismo diha sa mga magbabalaod karon ang pagdiki-diki pag-approve sa mga budget alang sa procurement sa mga importanteng kagamitan sa AFP ilabi na sa PAF. Di sad nato sila mabasol tungod sa mga nangaging kahiwian sa AFP.

Ang AFP dunay 15-year modernization program, apan pipila nalang ka tuig ang nahibilin mapupos na kini apan wala pa gihapon ‘mahitsas’ ang AFP. Kini nagpasabot nga ang kurapsyon sulod sa AFP ug ang kawala pay salig ngadto kanila. Gani milusad nalang og self-reliant program ang AFP aron magamit sa ilang trabaho ug makatabang usab sa pagpamenus sa gastos sa gobiyerno kumparar sa pagpalit og mga brand new nga mga armas.

 Ang mga gubaon nang abyon kuhaan og piyesa aron itapak sa naguba apan ‘maayum-ayuman’ pang abyon, mao usab kini nahitabo sa Philippine Navy ug sa Philippine Army.

Kun kini magpadayon, ang giayum-ayuman maguba ra gihapon sa pag-abot sa panahon.

Ang usa ka piloto paeskuylahon sa gobiyerno og upat ngadto sa lima ka tuig sa Philippine Military Academy ug sa flying school sa PAF ug mopailawom pa og uban pang upgrading training aron mahingpit nga mahimong piloto.

Apan human makuha ang “wings” papaluparon lang og ‘inayum-ayom’ nga abyon nga sumala pa sa uban mga ‘flying coffins.’ Pagka-makaluluoy nalang gyud nato.

Sa ubang nasud, importanteng maluwas nila ang ilang mga piloto kay nasayod man silang dugay ug lisod ang pagbansay kanila samtang ang usa ka abyon mahimo ra nilang i-manufacture sulod lang sa duha ngadto sa tulo ka bulan.

Hangtud nga di mausab ang panglantaw ngadto sa AFP sa atong mga magbabalaod moabot ang panahon nga ang atong kasundalohan magdala nalang og pitik kun tirador o ba kaha batuta.