Usa ka e-mail ang akong nadawat sa miaging adlaw nagpahibawo sa giingong pagpangawat og copper wires diha sa tugpahanan sa Mactan. Basi sa e-mail usa kuno sa kawani sa Mactan Cebu International Airport nga igsuon ra sab sa usa sa mga managers.
Ang pagpangawat nahitabo niadtong Pebrero 15 sa hapon diin ang empleyado nasakpan gyod sa akto nga naghupot sa mga kinawat nga electrical wires. Sumala pa sa akong tinubdan, nga ang maong mga wires alang unta sa back-up generator sa Most Important Person Lounge diha sa MCIAA.
Ang akong tinubdan miingon nga napugos siya sa pagpadala og e-mail kanako tungod kay buot ning tagoan sa mga opisyal sa MCIAA sanglit ang empleyado nga nalambigit gikatahong igsoon sa usa ka opisyal sa usa sa mga departamento sa MCIAA.
Ang Officer-In-Charge sa Engineering Dept. diha sa MCIAA nga si Engr. Achilles Ponce giingon nga maoy personal nga mitawag sa police division nga dili lang i-blotter ang hitabo.
Ang kadagkuan sa MCIAA wa sab mohimo og imbestigasyon batok sa kawani nga nasakpang nangawat. Pugngan ko lang una ang pangalan sa maong kawani apan nanghinaot ko nga silotan siya sa kadagkoan sa MCIAA.
Angayang lakip sa silotan mao si Ponce tungod sa pagtabon niya sa pagpangawat sa usa ka empleyado. Ang labing pait matud pa sa akong tinubdan mao nga ang janitor sa MIMS janitorial services nga maoy nakasakop sa pagpangawat ug maoy mipahibawo sa mga security guards mao na hinuoy gigukod ug namiligro nga matangtang sa trabaho.
Unsa may nahitabo sa mga opisyal sa MCIAA, gibaliw? Nganong ang janitor naman hinuon nga maoy nakasakop sa pagpangawat maoy gukdon inay nga ang kawani nga kawatan maoy taktakon ug pasakaan og kaso?
* * *
Gimando ni Presidente Gloria Macapagal Arroyo ang pagsuspenso sa pagpatuman sa mga memorandum circulars sa Maritime Industry Authority nga sentro sa reklamo sa mga shipping operators aron pugngan ang bahad sa mga tag-iya og barko nga ihinayon ang ilang welga karong Lunes.
Ang paglukmay sa presidente ug pagtalaw sa hulga sa mga tag-iya og barko timailhan sa ka inutil sa gobyerno pagpatuman sa mga polisiya niini nga kontra sa interest sa mga dagkong negosyante ug mga adunahang mamuhonan.
Bugti sa pagtalaw sa gobyerno mao ang pagbutang sa piligro sa siguridad sa mga sumasakay og barko. Kini tungod kay ang pagsuspenso sa pagpatuman sa mga memorandum circulars nagpasabot ni nga dili na pugson ang mga operator og barko nga mopalit og mga kasaligan nga mga life saving devices alang sa ilang mga barko nga magamit sa mga pasahero panahon sa emergency.
Dili na sab pugson ang mga tag-iya og barko nga mo-hire og mga qualified crew members nga maoy modumala sa ilang barko. Dili na sab sila pugson nga mokuha og klarong insurance alang sa mga pasahero.
Resulta niini kun simbako dunay aksidente sa kadagatan, pabiling way kasigurohan ang mga pasahero kun garantisado ba ang mga life jackets ug life rafts sa barkong ilang gisakyan. Wa sab silay kasigurohan kun ang crew sa barkong ilang gisakyan mga kuwalipikado ba ang tanan ug labaw sa tanan way kasigurohan mabayran ba og tarong ang ilang pamilya sa insurance simbako kun dunay dautang mahitabo niya.
Mao ni ang gisakripisyo ni Arroyo sa iyang pagsanong sa kapritso sa mga tag-iya og barko inay nga protehian ang interest sa mga kabus nga sumasakay.
Wa kinahanglana nga motalaw ang gobyerno sa bahad sa mga tag-iya og barko, ang angayan niining gihimo mao ang pagpangandam unsaon pagtubag ang epekto kun mahinayon ang welga. Inay nga mokakak maayong nangita sila’g paagi paghatag og insentibo sa uban nga mga operators nga dili mosalmot sa welga sama sa gihimo ni Mayor Tomas Osmeña dinhi sa dakbayan matag higayon nga dunay transport strike nga himuon ang mga drivers.
* * *