Hulga sa SK

Maayong tutokan karon sa Department of Interior and Local Government (DILG) ang mga Sangguniang Kabataan Federation sa lainlaing mga lokal nga kagamhanan nga nag-atubang og daghang isyu, ilabi na sa imoralidad.

Daghan nang mga SK chairman ug SK councilor nga mga babaye nga nangamabdos bisan wala makasal ug walay bana nga mibarog. Sa laktod, napaangkan.

Apan ang SK Federation nga ginsakpan niining maong mga SK chairman ug councilors wala makapahamtang og disiplina tungod sa nahidangatan o pagrekomendar sa hingtungdang SK official sa pagpakasal.

Nasayod ang DILG ug ang SK National Deferation nga usa ka hulga sa Sangguniang Kabataan ang imoral nga pagpuyo sa ilang sakop, apan hangtod karon wala silay na-umol nga programa aron matutokan kining maong suliran sa federasyon.

Sama pananglit sa SK Federation sa Cebu City, dugay na diay’ng nasayod sa nahitabo sa usa ka sakop nila nga nimabdos apan walay bana ug wala makasal, apan wala mo-aksiyon.

Ang SK chairperson sa barangay San Nicolas – Proper nga si Jon Bernadeth Villacorta nag-atubang na og kaso sa SK Federation, apan ang mga ginikanan ug mga batan-on nga mireklamo sa nahidangatan ni Villacorta napa-ilawom hinuon sa “moro-moro investigation.” Ang ilang ebidensiya nga gihuptan wala ipresentar kang Virgie Clapano (Clapana) sa DILG, ug ila hinuong gitagoan.

Si Clapano usab, inay mag-imbestigar sa kamatuoran, mipakita na hinuon sa iyang bias pabor kang Villacorta. Nagtuo tingale kini ug ang SK Federation nga mga buringog ang mga nangreklamo, nga karon naghunahuna sa pagdangop na lamang sa Ombudsman aron mapatubag si Villacorta, Clapano ug Rengelle Pelayo nga mibiya bisan wala pa mahuman ang hearing niadtong Lunes sa hapon.

Usa ka seryoso nga hulga sa kalihukan sa SK ang imoralidad, ilabi na ang pagmabdos sa babayeng walay bana.

Dili maayong panig-ingnan ang maong sitwasyon sa usa ka SK chairman ngadto sa kabatan-onan sa iyang barangay. Dautang ehemplo kini nga angay hatagan og igong pagtagad sa nahingtungdang ahensiya -– ang DILG. Apan kun dili makadisiplina ang SK Federation o ang DILG, ang Ombudsman maoy angay dangpan sa mga testigos.

* * *

Si Sen. Manny Villar ug runningmate nga si Sen. Loren Legarda mi-amen na kang Arsobispo Ricardo Cardinal Vidal, atol sa pag-anhi sa ilang tibuok slate dinhi sa Sugbo niadtong miaging semana.

Makonberter kaha sa botos sa mga Sugboanon ang ilang pag-amen kang Cardinal Vidal?

Ang duha ka kandidato sa Nacionalista party (NP) ug Nationalist Peoples Coalition (NPC) nagkanunayan na dinhi sa Sugbo aron manguyab sa mga Sugboanon.

Ang mga Sugboanon hinuon nahibaw-an na nga mga “intelligent voters” ug adunay kaugalingong “standard” pagpili og kandidato.

Mao gani nga hangtod karon nagpabiling kuwestiyon ang usa ka milyon nga mayoriya ni Pres. Gloria Arroyo ug Bise Pres. Noli de Castro sa Sugbo niadtong 2004 presidential election, nga maoy namatyan sa kaatbang nga si Fernando Poe Jr.

Usa sa mikuwestiyon sa maong mayoriya si Sen. Legarda ug nahinumdom pa gyud ko nga mismo ang mga Sugboanon napasanginlang mga tikasan tungod sa pagkaparot niya ug sa iyang standard bearer nga si FPJ.

Nahibaw-an hinuon ang mga Sugboanon nga dili madinumtanon. Ma-aplay kaha kining maong dili pagkamadinumtanon sa eleksiyon karong 2010?

Busa gibalikbalikan gyud ni Loren ang Sugbo aron manguyab og balik, human sa iyang pasangil niadtong 2004.

Ang kaayo ni Gob. Gwendolyn Garcia kaniya maoy iyang gihimong taytayan aron makaduol siya og balik sa mga Sugboanon pinaagi sa pagkuyog sa Suroy-Suroy sa Sugbo.

Bisan nasayod si Loren nga komitado na si Garcia kang Gilbert Teodoro nga standard bearer sa Lakas-Kampi-CMD, giputol niya ang iyang kaikog sa iyang runningmate nga si Villar ug mikuyog kang Garcia sa Suroy-Suroy.

Gani naglaum kini nga maoy ituboy ni Garciaisip vice presidential candidate nga sagopon sa One Cebu Party. Kini human ang One Cebu wala motuboy kang Edu Manzano.

* * *

Karong adlawa, ania na usab si Sen. Mar Roxas, ang presidente sa Liberal Party ug maoy vice presidential candidate sa maong partido, aron modawat og pasidungog gikan sa Cebu City Government atol sa Charter Day.

Si Roxas ug Loren gitan-aw nga maoy magbangga sa Mayo 2010 election pagka-bise presidente.

Nag-iyahay sila og paninguha nga mailhan sa katawhan ug makapasabot sa ilang mga programa engkaso og mapili karong Mayo.

Ang mga botante sa nasud mopili kanila sumala sa ilang baruganan sa nagkalainlaing isyu, sinsiridad sa pagserbisyo sa katawhang Pilipino ug integridad.

Pilion usab sila sumala sa ilang gibilin nga performance isip mga sakop sa Senado.

Ang kulang na lang mao ang pagtimbangtimbang kinsa gayod kanila ang mobarog.

Sa pagka-presidente, si Sen. Noynoy Aquino ug Villar gukodgukod usab sa rating sa mga survey. Apan karong bag-o, si Noynoy ug Mar ang nag-una sa survey nga gihimo.

Ang survey resulta lamang kana sa pangutana sa pipila lamang ka mga Pilipino nga mahimong matuman o dili panahon sa eleksiyon.