Kinsay nagkuwang sa serbisyo?

Aron mahadlok ang mga drayber paghimo’g kalapasan sa mga lagda sa Transportation and Traffic Code, angay nga estriktohon gayod ang pagpatuman sa balaud nga suspensohon ang ilang lisensya balig duha ka tuig kun sulod sa usa ka tuig madakpan ug makonbikto sila sobra sa duha ka higayon.

Akong gilantaw nga kun estrikto lang nga ipatuman sa Land Transportation Office (LTO) ang lagda sa Republic Act 4136, section 27, unya estrikto usab ang mga traffic/transportation enforcers nga manakop, hapsay g’yod kaayo ang atong karsada.

Matag adlaw god mag-drive man g’yod ko gikan sa balay paingon sa opisina, ug gikan sa opisina pauli sa balay inigka-gabii.

Tungod niini, sinati kaayo ko sa batasan sa mga drayber ug public utility vehicles, sama sa PUJ ug taxi, nga abusado kaayo sa pagmaneho sa ilang mga sakyanan.

Ang tinuod, ang mga drayber og private vehicles – walay labot sa mga mag-drive og motor -- mahadlokon man g’yod nga magpasagad lang sa pagmaneho kay dili sayon kun madisgrasya ang imong sakyanan.

Kining mga drayber og PUJ o taxi nagsalig ra man kini sila nga ang sakyanan nga ilang gimaneho dili man ila. Ang lagda g’yod mao nga dili man unta angay’ng dutdoton ang gisunod nga sakyanan.

Angay g’yod unta nga “one car space” ang distansya aron nga inig brake sa nag-una nga sakyanan dili g’yod mahitabo nga mabanggaan sa nagsunod.

Makadaghan na ko nga gikalitan lang og “insert” og laing sakyanan nga gimaneho og abusadong mga drayber nga kun dili ka mag-inabtik imo nga kini nga madam-agan.

Kinsa may sad-an niini? Ang mga opisyal sa LTO maoy angay’ng basulon kay wala nila ipatuman ang gilatid sa RA 4136, section 27.

* * *

Pasidunggan diay kuno sa dakbayan ang namatay nga si Jojo dela Victoria atul sa Charter Day sa dakbayan karong adlawa.

Uy, nganong karon na man lang ang maong pasidungog nga si Jojo gipatay kaniadto pa mang 2006. Angay g’yod hinoon nga si Jojo hatagan og pasidungog tungod sa iyang maayong serbisyo pagka pangulo sa Bantay Dagat kaniadto.

Unya kay naghisgot man ta og Bantay Dagat, ato ra god nga pangutan-on nganong wala na may maayong kalampusan ang Bantay Dagat Task Force ubos sa pagpangulo karon ni Cesar Enriquez.

Kun imong huna-hunaon, mas bentaha pa gani unta si Enriquez kay duna man siya’y military background, apan wala may silbi. Mas maayo tingali nga ang mga opisyal sa City Hall mo-review sa appointment ni Enriquez.

Pananglit matan-aw ninyo nga dili epektibo si Enriquez sa iyang pwesto, mas maayo tingali nga balhinon siya og laing katungdanan nga haum siya.

Apan dunay misulti nako nga kini si Enriquez suod kuno kaayo sa mayor. Anhi masukod kun maayo ba nga manager si Mayor Tommy Osmeña.

* * *

Nakabisita ko sa Fort San Pedro kaniadtong Lunes ug nalipay ko pagkakita nga ang kanhi dapit nga pwerteng samoka tan-awon, karon nindot na kay gibutangan na og nindot kaayong koral sa dakbayan.

Ang gipasabot nako mao ang kilid sa Port San Pedro plaza diha sa Legaspi Extention. Kaniadto, mga tindera maoy miukopar niini nga nagpalapad sa ilang pwesto ug mahal kaayo og mga baligya.

Salamat sa “political will” sa dakbayan kaniadto dihang giguba nila ang mga tindahan. Ingon niana kun duna lang g’yod tay kaisog sa paghimo sa tukma nga gimbuhaton aron ipatigbabaw ang kaayohan sa kadaghanan.