Sigun sa records sa City Accounting Office, walo ka mga huwes sa Municipal Trial Court in Cities ug 19 ka mga huwes sa Regional Trial Court ang nagdawatan og tag lima ka libo ka pesos matag bulan nga allowance gikan sa kagamhanan sa dakbayan sa Sugbo. Gawas sa nahisgutang kantidad, nakadawat pa gayod ang mga huwes og mobile phone allowances ug gipamalitan og sakyanan ug mga laptop sigun sa ilang pangayoon.
Ang maong kantidad sa allowance nga nadawat patas-an na kini sa kagamhanan sa Sugbo og katumbas sa usa ka bulan nga suholan sa mga huwes
Matud pa ni City Accountant Arlene Rentuza, ang mga huwes sa Municipal Trial Court in Cities nga nagdawatan og lima ka libo ka pesos matag bulan nga allowance gikan sa dakbayan sa Sugbo mao sila si Monalila Tecson, Anatalio Necessario, Edgemelo Rosales, Rosabella Tormis, Gil Acosta, Josephine Teves, Francisco Seville ug Oscar Andrino.
Samtang ang mga huwes sa Regional Trial Court nga nagdawatan usab og lima ka libo ka pesos nga allowance gikan gihapon sa dakbayan sa Sugbo mao sila si Eric Menchavez, Macaundas Hadjirasul, Meinrado Paredes, Sylva Paderanga, Bienvenido Saniel, Silvestre Maamo Jr., Simeon Dumdum Jr., Geraldine Faith Econg, Ester Veloso, Ramon Daomilas, Olegario Sarmiento Jr., Raphael Yrastorza, Gilbert Moises, Douglas Marigomen, Manuel Patalingjug, Soliver Peras, Generosa Labra, Estela Alma Cinco ug Enriqueta Loquillano Belarmino.
Sa mga huwes sa Regional Trial Court sa dakbayan sa Sugbo si huwes Gabriel Ingles lang ang wa modawat sa lima ka libo ka pesos matag bulan nga allowance, mobile phone allowance, sakyanan ug laptop nga gihatag sa kagamhanan sa dakbayan sa Sugbo tungod sa rason nga gusto niya nga magpabilin dili lamang ang actual kun dili hasta ang pagtoo sa pagka independente ug ang way gidapigan nga hukmanan.
Canon 1 sa Code of Judicial Conduct nagkanayon nga ang huwes kinahanglan nga mopabilin sa integridad ug pagka independente sa hudikatora. Ang ikatulo nga rule sa maong Canon nagkanayon nga ang huwes kinahanglan nga magmabinantayon batok sa mga pagsuway sa pagpadaplin sa pagka independente sa hudikatora ug pagsukol sa unsa mang pagpursige ni bisan kinsa.
Sa ilang pagdawat sa gihatag sa kagamhanan sa dakbayan sa Sugbo, gipaneguro sa mga huwes nga dili maapektuhan ang integridad ug pagka independente sa hudikatura. Motoo mo? Bisan tinuod nga ilang gipaneguro apan dili malikayan nga magduda na ang katawhan.
Ma-allowance, tabang o bisan unsa may itawag sa gihatag sa kagamhanan ngadto sa mga huwes dinhi sa dakbayan sa Sugbo, sa akong bokabolaryo suburno ang tawag niini busa midawat og suburno ang mga huwes gikan sa posibling kihanti sa umaabot nga mga adlaw. Sa ilang pagdawat sa gihatag nga allowance gikan sa siyudad nahalin ang mga huwes sa kagamhanan ni Mayor Tomas Osmeña.
Sakto si huwes Gabriel Ingles sa iyang baruganan busa akong gihangyo ang mga huwes dinhi sa Sugbo sa paghunong na sa pagdawat sa gihatag ngadto kanila sa siyudad aron dili madudahan ang hudikatura nga mao na lamay nahabilin nga kasaligan sa katawhan sa tulo ka sanga sa atong kagamhanan. Dili na ta makasalig sa atong ehekutibo ug lehislatura karon tugutan pa ba ninyo nga hasta mo di na namo masaligan? Puwede ba nga di na mo modawat sa gihatag nga suburno sa siyudad! Di na man seguro mo pobre?