Kaniadto pa kong nagduda sa sinsiridad sa One Cebu Party pagtuboy ni Gilbert “Gibo” Teodoro nga maoy kandidato pagkapresidente nga ilang suportahan dinhi sa Sugbo. Hangtud karon wala mahanaw ang maong pagduda labi pa sa labing awahing gihimo sa pangulo sa One Cebu Party nga si Gobernador Gwendolyn Garcia pagpabaklas sa mga campaign materials nilang Gibo nga kuno anaa ibutang gawas sa designated campaign area sa Commission on Elections.
Gamit ang takuban nga kunohay dunay mireklamo didto sa Comelec sa tarpaulin nilang tulo uban sa iyang runningmate nga si Glenn Soco gimando sa gobernador nga tangtangon ang mga posters ni Gibo. Sumala pa nga ang maong tarpaulin ni Gibo over sized hinungdan nga matud ni Garcia aron kuno likayan nga pistahan ang pagpanangtang niini sa Comelec siya nala'y nimando nga tangtangon ang tarpaulin ni Gibo.
Apan wa niya ilakip ang ilang duha ni Glen Soco. Nisamot ang katahap nga dili gyud kinasing-kasing ang pagsuporta ni Garcia kang Gibo tungod kay human langkata ang poster ni Gibo gipuli dayon ang mga posters nilang Manny Villar ug Loren Legarda.
Si Garcia nangugat pagpangulipas nga iyang talikdan si Gibo matud niya nga buot niyang kapahimuslan pa ang tarpaulin maong sila nala'y milangkat niini. Pero bisan giunsa pagpangulipas ni Garcia di gyud malikayang manimaho ang pagbudhi.
Pananglit matud ni Garcia nga iyang gipatangtang ang tarpaulin aron kuno dili maguba ug ila pang magamit. Sa unsa? Iyang ipabalhin og laing dapit nga wa nay moreklamo? Dili ba iya ning gipatangtang tungod kay over sized? Sa ato pa dili na ni nila mamahimong itaod pag-usab sangit kalapasan ni sa balaud.
Matud pa usab ni Garcia nga ang pagtumaw sa posters nilang Villar ug Legarda hulip sa dapit diin gilangkat ang tarpaulin ni Gibo usa lang kuno ka matang sa pagpangintriga ug nga buot lang ang duha ka mga kandidato sa Nacionalista Party nga mosakat sa popularidad nilang duha ni Glen Soco. Ha ha ha ha ha! Kinsay iyang ilaron? Dili ba si Legarda mao may iyang kandidato pagka bise presidente?
Kun tinuod ang sulti sa akong tinubdan, si Garcia pa gani kuno mismo ang mimando nga ipagisi-gisi ang tarpaulin ni Gibo. Of course, posibleng kini maoy tinud-anay nga intriga. Apan ato ning masuta ang tanan kun mahitabo tinuod ang gitug-an sa akong tinubdan nga karong sunod bulan himoon sa One Cebu ang pormal nga pagpahibawo sa ilang pagtakli sa suporta ngadtong Villar.
Dili imposible ang maong talan-awon, kini tungod kay sukad pa sa sinugdanan duna nay mga timailhan sa sekreto nilang panag-abin. Pananglitan, ang kandidato unta ni Villar pagka-kongresista sa 2nd district nga si Sarsi Baricuatro kalit nga miatras batok sa amahan sa gobernador.
Ang anak sab ni Sarsi wa sab modayon sa pagpakigsakbang sa igsuon sa gobernador isip mayor didto sa Dumanjug.
Laing rason nga dili layo ang posibilidad nga si Villar mao gyu'y suportahan ni Garcia, kun dili man gani ipadayag apan sigurado kong mahitabo ni sa hilom, mao ang suporta ni Kongresista Eduardo Gullas. Si Gullas tua mosuporta ni Villar lakip ang tanan niyang mga mayor sa first district. Si Gullas miangkong suod silang Villar ug nga aktibo siyang mangampanya pagdala sa kandidatura niini dinhi sa Sugbo. Makabalibad kaha si Garcia kang Gullas kun mohangyong si Villar maoy suportahan pagkapresidente? Isakripisyo kaha ni Garcia nga mahanaw ang suporta sa mga mayor sa first district tungod ug alang kang Gibo?
Wa ko makakita og rason nganong mohimo si Garcia sa sakripisyo. Una, way mahimo si Gibo pagtabang sa kandidatura ni Garcia nga karon gihulga sa anak sa ligdong ug dungganan nga kanhi Chief Justice nga si Hilario Davide.
Ikaduha, mas makabintaha siya kun si Villar maoy iyang dad-on nga kandidato tungod kay gawas nga mas dako ni purohang modaog basi sa survey sigurado pa gyud ning dili mamukong. Sa ato pa posible pa siyang makakuha og dakong pundo alang sa kampanya sigurado pa gyud nga magpabiling solid alang niya ang grupo ni Gullas.
Sa laktud wa magsalig si Garcia ni Gibo aron makadaog tungod kay kun resources maoy hisgutan di hilabwan ang mga Garcia.
* * *