Mga abusado kaayo!

Samtang nag-drive ko sa akong sakyanan adtong miaging gabii didto sa dalan Echavez, diriyot ko mabangga sa gikasugat ko nga sakyanan nga ang drayber wala magpasiga sa iyang headlight.

Nagsunod man god siya sa laing sakyanan unya medyo misiwil ang pangunahang bahin sa iyang sakyanan mao nga kun wala pa ko makaabtik og lubag sa manobela pa-demano, dam-ag g’yod mi.

Ang nakapait kay PUJ ang maong sakyanan. Mao nga kun nagkabangka pa kami, sigurado nga ang akong sakyanan maoy maguba. Ingon niini ang nakaparat kay bulok kaayo ang kadaghanan sa atong mga traffic enforcers.

Kamong mga buotang motorista, nakabantay g’yod tingali mo nga daghang drayber nga dili magpasiga sa ilang headlight panahon sa gabii apan gitan-aw lang sa mga traffic enforcers.

Dinhing bahina nga makaingon ko nga kini si Arnel Tancinco nagkuwang sa iyang pagsuperbisar sa iyang mga sakop sa CITOM. Mao kini nga makaingon ko nga nag-usik-usik lang ang syudad pagsweldo aning tawhana.

Unsaon, abi kay “executive officer” kuno siya, naa ra sab sa opisina magluklok. Nganong wala man pangdakpa sa mga traffic enforcers kining mga drayber nga dili magpasiga og suga panahon sa gabii? Dihang aktibo pa ako kaniadto sa pagpanakop, daghang drayber nga akong gidakop tungod niini. Karon, ako na usa’y moingon nimo Arnel nga basa-basa usab og balaud.

Basaha ra god ang mga lagda sa Republic Act 4136, (Transportation and Traffic Code) aron masayod ka nga ang mga drayber nga momaneho sa ilang sakyanan panahon sa gabii kinahanglan g’yod nga mopasiga sa ilang headlight.

Unya, hangtud karon Arnel, palpak ka pa gihapon kay ang traffic enforcer nga gidistino nimo sa eskena Sudlon, Lahug, magsigi lang gihapon og barug daplin sa karsada.

Bisan og grabe na ang trapiko sa eskena Sudlon ug Gorordo Avenue, ang imong traffic enforcer, kaniadtong Biyernes man tingali kadto duha pa kabook, didto ra sa layo naghinan-aw lang sa problema. Tarong ba kana?

Maayo pa og magdungan mo’g resign sa inyong trabaho kay wala g’yod mo’y pulos. Kun ako pa ang traffic enforcer, giyahan nako ang mga drayber aron dili mag-iya-iya lang og lusot.

Kana maoy tarong nga matang sa traffic enforcer. Kamong mga traffic enforcer, kun wala kamo tudloi ni Arnel sa husto nga pamaagi, gamita na lang ang inyong utok.

Makapila na ka higayon nga gituki nako kining maong isyu, apan kini si Arnel Tancinco wala g’yod magtagad. Mao kana nga ang mga drayber walay respito sa mga CITOM enforcer, ilabi na nga dunay uban nga mangilkil.

* * *

Hangtud karon kadtong nag-text nako nga mikwestyon kay gidayeg nako ang Task Force Alpha, wala pa g’yod makahatag og kamatuoran sa iyang pasangil.

Mahadlok usab makig-atubang kay kuno basin og siya mailhan. Pastilan, dunay panultihon nga ayaw kahadloki ang pagtug-an sa kamatuoran, bisan pa man og sa pagbuhat mo niini, magkahulogan sa imong kamatayon.

Dili man usab g’yod ko motug-an kun kinsa ang akong informer. Bisan pa og kinsa ang mangutana kanako, dili g’yod nako itug-an. Busa kamong dunay mga inpormasyon ayaw kahadlok. Apan kun ang inyo pulos lang tumo-tumo, ayaw na lang. Kun nadakpan kamo sa mga sakop sa Task Force Alpha nga estriko nga mopatuman sa balaud sa trapiko, ayaw himo-himoi og report.

Kun tinuod man gani, ayaw kataha ug ayaw kahadlok pagtug-an nako basi sa dukomento, o kaha pakigkita aron atong sutaon ang kamatuoran.