EDITORYAL - Hain na man tong BRT?

Human sa mainitong binayloay og hunahuna bahin sa angayang mass transport system nga adoptahon sa Sugbu -- ang BRT ni Tomas o ang LRT ni Eddiegul-- kahilum na ron ang mihari.

Si Mayor Tomas Osmeña kusganong miduso sa iyang Bus Rapid Transit alang sa siyudad. Iyang hugtanong gibabagan ang Light Rail Transit ni Rep. Eddie Gullas.

Mas masayon kuno implementahon ang BRT kay sa LRT. Karon hain na man nang BRT nga sayon himuon?

Pangutana kini sa usa ka Sugbuanon nga mitawag sa iyang kaugalingon nga “concerned citizen regarding the modernization of the transportation in the city.”

Sa e-mail nga iyang gipada sa publisher ning mantalaan, ang maong concerned citizen, misaway sa mga Sugbuanong lider nga kuno “pulos lang laway” ang migawas sa baba.