Task Force Alpha

Maayong balita sa mga sakop sa Task Force Alpha, ang usa sa mga enforcement arms sa Land Transportation Office (LTO) dinhi sa dakbayan sa Sugbo.

Nagkahinabi gayod kami si LTO Chief Arturo Lomibao kaniadtong Biyernes dihang mianhi siya sa Sugbo.

Akong gitug-anan si “General Lomibao” nga isip sakop sa media wala g’yod ko makadungog nga dunay binuang ang Task Force Alpha sama sa ubang deputized agents nga kusog kaayong mangwarta.

Giangkon ni Lomibao nga daku kaayo ang tabang sa Task Force Alpha sa kalihukan sa LTO dinhi sa dakbayan mao nga mipasalig siya nga sa dili madugay tugotan na niya kini nga makahimo pagbalik og operation.

Duna pa hinoo’y mga papeles nga gikinahanglan aron nga mahimo g’yod nga legal sa iyang operation. Dili na lang nako idetalyi pag-ayo kay internal matters na man kini.

Si Mayor Tomas R. Osmeña, kinsa usa sa mga honorary members sa Task Force Alpha, daku kaayo og ikatabang nga katugotan pagbalik ang mga sakop sa task force nga maka-operate.

Sagad sa mga operation sa task force naa man g’yod ko ug dili ko makatugot nga dunay magbinuang. Kini maoy rason nga walay TFA deputized agents nga gitugotan nga modugay-dugay pag-isyu og TOP sa madakpang drayber.

Buyno, kamong mga abusadong drayber siguradong pangulbaan na usab kun makabalik ang Task Force Alpha sa operation. Kadtong mga buotang drayber dili man g’yod mahadlok nga mobalik ang TFA sa pag-operate kay dili man sila madakpan.

Apan kadtong mga badlongon, ilabi na kadtong mga drayber nga magpadagan sa gabii nga dili magsuga, siguradong makamulta.

* * *

Gikuyawan ko sa statistics nga nagpakita nga sa matag napulo ka drayber og mga PUJ dinhi sa Sugbo, usa kanila ang tiggamitan og gidili nga matang sa drugas.

Lima sa 50 ka draybers og PUJ nga gihimoan og kinalit nga drug test kaniadtong Biyernes napositibo sa shabu ug marijuana. Wala ba kamo kuyawi niining maong inpormasyon?

Kun magsakay kita sa mga sakyanan, ang atong kinabuhi gipiyal nato ngadto sa kamot ug tiil sa mga drayber. Kun ang maong mga drayber wala sa maayong panghuna-huna kay nagumon sa drugas, unsay mahitabo?

Kaniadtong miaging tuig, kapin sa 20,000 ka mga hitabo sa kadalanan ang na-rekord sa LTO. Abi ninyo og unsay makapakulba? Ang 48 porsyento kun hapit katunga sa gidaghanon sa maong mga pasyente, nahimo tungod sa reckless driving. Sa ato pa sa kadanghag sa mga drayber. Paet!

* * *

Gilusad usab atul sa pag-anhi sa Sugbo ni Lomibao ang LTO Citizens Charter. Unsa man kini?

Mao kini ang pamaagi sa LTO nga ang katawhan tudloan unsaon nga mapadali ang pagkuha nila og mga dukomento nga buot nilang kuhaon sa LTO aron dili na mosiaw ang mga fixers.

Nakadungog ko nga wala kuno’y fixers ang LTO diha sa Lapulapu ug Talisay. Tinuod ba kini? Kun tinuod kini, pahalipayan nato sila si district heads Aurea Angcay ug Bernardo “Dodong” Borromeo.

Nganong dili man gayod mapuo ang mga fixers diha sa LTO-7 regional office? Suheto kaayo ko nga wala pa g’yod kini mahunong hangtud karon. Angay kini nga tubagon ni LTO-7 regional direktor Raul Aguilos.