Kun ako maoy mayor sa dakbayan unya daghan og kwarta ang City Hall, usa sa mga proyekto nga akong hatagan og pagtagad mao ang pagpaanindot sa atong mga karsada.
Dili ikalimod nga pwerteng daghana nga mga karsada dinhi sa dakbayan nga bati kaayo.
Kun nindot pa unta ang atong mga karsada, tingali dili gayod kaayo grabe ang traffic congestions nga atong masinati kay ang ubang sakyanan adto man moagi sa mga alternate roads.
Sama diha sa highway kanang gikan sa North Reclamation Area tungod sa SM City, grabe kahuot ang mga sakyanan panahon sa “peak hours” nga unya daghan man og karsada diha.
Unsaon, bati man kaayo ang maong mga karsada mao nga walay ganahan nga moagi. Mag-antos na lang ang mga drayber sa traffic kay sa adto sila moagi nga posibleng maguba pa ang ilang sakyanan.
Abi ninyo, dili kaayo ko mosagop sa pamahayag ni Mayor Tommy Osmeña nga naglibog na sila og unsay gastohan sa daghang kwarta sa dakbayan.
Bisan pa tingali og lima ka bilyon ka pesos ang surplus sa dakbayan sa Sugbo dili kini paigo nga gastohon sa mga panginahanglan aron kahagatan og kasayon ang katawhan.
Gipahibalo ni Tommy nga mohatag ang dakbayan og scholarship sa mga mogradwar sa public high schools dinhi sa dakbayan. Dinhing puntoha, pagakpakan nako siya.
Usa kini ka nindot kaayong lakang ni Mayor Tommy. Daghan ang makabinipisyo sa iyang proyekto kay hapit tanan nga nagpa-eskwela diha sa mga public schools dili man g’yod datu.
Apan dili ko mopakpak sa iyang plano nga pahatagan niya’g scholarship ang mga mogradwar sa high school sa Cordova ug ang tag P2,000 nga cash assistance sa mga senior citizens sa maong lungsod.
Maayong unahon unta nato ang mga gastohanan nato dinhi sa atong dakbayan. Mahimo tingali nga mohatag kita og hinabang sa mga silingan nato nga lungsod kun wala na kita’y daghang problema.
Akong awhagon si Mayor Tommy nga suroyon niya ang mga interior roads dinhi sa dakbayan aron makita niya ang mga panginahanglan sa pag-atiman.
Ikaduha, kun mapaanindot na nato ang maong mga karsada, estriktohon na nato ang mga sakyanan nga anha lang iparada sa karsada.
Tan-awa ang karsada duol sa Marco Polo Plaza Hotel, pwerteng sinawa kay lapad kaayo kay bag-o pa nga giaspalto. Ang problema kun gamiton ra ang daplin niini nga parking area sa mga sakyanan.
Nalipay ko kay kaniadtong miaging buntag, may nakita ko nga sakyanan sa One Stop Towing nga naghimo og operation sa maong dapit.
* * *
Nganong duna may mga baligya nga gisakmit sa Squatters Prevention Encroachment Elimination Division (SPEED) nga giuli sa mga tag-iya unya ang uban wala?
Maayo nga ipasabot kini ni Major Vicente Mercado, ang hepe sa SPEED.
Apan awhagon usab nako si Major Mercado nga himoan g’yod niya og aksyon kining mga tindera og imahen sa mga santos diha sa dalan D. Jakosalem nga anaa na maninda sa karsada.
Pasensya lang kamong mga tindera og imahen nga akong mga higala kay mosaway g’yod ko kaninyo kun mohimo kamo og pag-abuso. Ayaw na kamo paninda diha sa gawas sa puthaw nga koral.
Unya, ikaw Major Mercado, ug kamong mga sakop sa SPEED, ayaw pagligoy-ligoy. Mao man bitaw nga kun wala kamo’y kaubang polis dili gayod mahadlok kaninyo ang mga vendors.
Patabang god mo sa mga kauban ninyo sa SPEED kaniadto nga karon nagsilbi lang nga bata-bana ni Gerry Marquez.