Hiling sa BITAG ng mga Pinoy sa Vallejo, CA

ILANG e-mail messages na ang aming mga natanggap mula sa Pilipino community ng Vallejo, California.

Nag-aalala sila sa pagtaas ng krimen at sunod-sunod na patayan sa Vallejo.

Nakilala namin ang ilan sa respetableng Fil-Am leaders noong bumisita ang BITAG, Agosto ng nakaraang taon.

Hinihikayat nilang muli ang BITAG na bumalik at i-cover ang Vallejo Police sa kanilang mga aktuwal na operasyon.

Matagumpay kasing naisagawa ng grupo ng BITAG ang patrol car ride along sa tulong ng mga Pilipino-Ame­rican cops.

Nakilala namin ang halos lahat ng mga pulis na  Ame­rikano at Pilipino sa Vallejo subalit karamihan sa kanila ngayon, tinanggal na sa kanilang trabaho.

Tuloy pa rin ang aming pakikipag-ugnayan, sa mga natitirang Pil-Am cops na’to. May hinanakit sila sa gina­wang hakbang ng Vallejo City Council na bawasan ang kanilang puwersa. 

Ang nasabing retrenchment o pagbabawas ay dahil sa pagbagsak ng ekonomiya ng US., ang recession.

Sa anumang kadahilanan, hindi namin makita ang punto ng ilan sa kanila sa Pilipino community na i-cover muli ang Vallejo sa nangyaring pagtaas ng krimen.

Sinagot na namin ang kanilang kahilingan na kami’y babalik muli ngayong Hulyo o Agosto ng taong ito.

Gusto ring makita ng BITAG ang tindi ng pagtaas ng krimen sa California gawa ng pagbagsak ng ekonomiya.

Ayon na rin sa isang Pil-Am cop na nakasama na-min, bagamat masama na ang sitwasyon ng kanilang depar­tamento gawa ng pag­babawas, tumaas naman daw ang kanilang morale.

Ito’y matapos nilang ma­panood ang kopya ng isang buong episode ng BITAG na pinamagatang, Pil-Ame-rican cops na ipinadala namin noong buwan ng Nob­yembre, 2009.