Palawod sa kinabuhi

Usa sa mga kinaiya ning atong panahon karon mao ang kahadlok nga manimpalad sa mga hilit nga dapit sa kinabuhi. Kini tungod kay daghan kanato ang nahimo mang ganahan lamang sa bisan unsa nga mabaw kay lagi diha sa kamabawan daw luwas ang tawo. Kini tungod kay diha sa lawom nga bahin sa kinabuhi anaa ang way kasegurohan kanila nga mahadlokon sa hagit sa kinabuhi. Apan sa dihang si Simon Pedro nagpalawod iyang nakita ang matuod nga bulok sa iyang pagkatawo. Huyang siya ug masalaypon. Apan sa maong pag-amgo iya usab nga nakita ang linain nga tahas ning tungora ang pagkahimong mangingisda og mga tawo. Diha sa maong tahas nahimong daw nausab ang dagan sa kinabuhi ni Simon Pedro. Ang iyang paglawig nahimong usa ka laing sukaranan sa usa ka kulbahinam nga pagpanimpalad sa matang sa kinabuhi nga dili siya suheto. Tinuod daghan ang buslot diha sa pagpaningkamot apan dili kini babag aron mohimo kita og kalainan. Hinuon diha sa paghimo og pagpalawod gikinahanglan lang gyud ang matuohong kaisog.