Natanggong sa trapiko
Dili angayang maguol si Chief Inspector Leoncio Baliguat, Jr. sa iyang gidangatan tungod sa pagkatanggong sa convoy ni Presidente Gloria Macapagal Arroyo didto sa Minglanilla niadtong Enero 24 tungod sa ilang kapakyas pag-atiman sa dagan sa trapiko.
Kini tungod kay posibling dunay mosunod niya nga relibohan ug imbistigahon tungod gihapon sa susamang hitabo. Sama sa nahitabo sa Minglanilla ang convoy sa presidente natanggong sab niadtong Miyerkules sa hapon diha sa may Gorordo Avenue ug General Maxilom Avenue tungod sa hu-ot nga trapiko.
Ang presidente gikan sa kalihukan sa I.T. Park ug nagpaingon sa Cardinal’s Palace aron pagpakigkita ni Arsobispo Cardinal Vidal dihang natanggong ni sa trapiko sulod sa mga singko minutos. Kun girelibohan si Baliguat tungod sa susamang hitabo way rason nganong dili sab relibohan ang hepe sa Cebu City Traffic Division.
Ang president convoy paingon sa lungsod sa Argao aron pagtambong sa lubong ni kanhi Press Secretary Cerge Remonde dihang natanggong sa Minglanilla tungod sa traffic jam. Ang kapolisan sa Minglanilla nga gipangulohan ni Baliguat maoy gibasol tungod kay giingong walay pulis nga nagbantay atol sa maong higayon.
Si Baliguat wa sab sa police station niadtong higayona tungod kay giingong nag-atiman ni sa manganakay niyang asawa. Tungod sa maong hitabo ang hepe sa kapolisan sa probinsiya nga si Supt. Erson Digal mirekomendar nga relibohan si Baliguat ug ipaubos sa summary hearing tungod sa kasong administratiba.
* * *
Sulod sa pipila na ka mga surveys nga gipahigayon sa SWS ug Pulse Asia nagpabiling wa mosaka ang rating sa mga manok sa administrasyon. Sila si Gibo Teodoro ug ang iyang runningmate nga si Edu Manzano wala gihapon kaabot og double digit.
Si Gibo gilansang sa five percentage points samtang si Manzano wala sab gihapon mogukod sa rating nilang Mar Roxas ug Loren Legarda. Kun qualification ang hisgutan dili hilabwan ang mga manok sa administrasyon. Si Gibo number one sa bar samtang si Manzano maayo og record sa panirbisyo sa gobyerno. Nagsilbi siyang besi mayor kaniadto sa Makati City gikan sa 1998 hangtud sa 2001.
Di sab hilabwan ang iyang performance sa Optical Media Board dihang natudlo siyang chairman sa maong ahensiya sulod sa lima ka tuig sukad niadtong 2004 hangtud sa 2009.
Usa sa mga qualities nga gihuptan ni Manzano mao ang disiplina nga iyang nakuha gikan sa military service sa Amerika diin siya nahimong sakop sulod sa upat ka tuig sa U.S. Air Force sa wala pa siya mobalhin dinhi sa Pilipinas aron sa pagsulod sa showbiz isip actor diin nanghakot sab siya og daghang mga pasidungog.
Apan nganong bisan sa ilang mga qualifications wala man mo rate ang mga kandidato sa administrasyon? Ang dakong hinungdan niini mao ang ilang pagkaduhig sa unpopularity sa pamunoan ni Presidente Arroyo.
Ang angayang buhaton nilang Manzano ug Teodoro mao ang pagkulit og ilang kaugalingong identity buwag sa administrasyon aron mosaka ang ilang rating. Anugon ang mga kwalipikado nga mga kandidato sama nila kun lupigon lang sa mga trapiko ug gipasanginlang mga kurakot nga mga kandidato tungod lang sa unpopularity sa ilang partido.
* * *
- Latest
- Trending
