Mga bakak ni Manny

Sa iyang pagtunga sa Senado gipabuhagay ni Senador Manny Villar ang iyang kalagot sa report sa Committee of the Whole nga nag censure kaniya ug nagmando sa pagpauli sa 6.2 bilyones ka pesos nga iyang nasakiyo tungod sa C-5 road extention project.

Sa iyang pagpamulong atubangan sa iyang mga kaubanan iyang giingon nga tapok sa mga bakak ang unod sa Committee report. Wa kuno siya mangawat ug wa mamakak. Ang tumong sa report mao lamang kuno ang paglingla sa katawhan ug pag guba sa iyang kadungganan.

Apan human sa iyang pagpamulong dali siyang mibiya ug wa na mamati sa mga pangutana sa iyang mga kaubanan nga gustong malamdagan sa iya untang mga pagpasabot.

Sa iyang pagbiya, gibiyaan usab ni Senador Villar ang dakong kahigayonan nga malimpyohan ang iyang pangalan. Pinaagi sa pagtubag sa mga pangutana sa iyang mga kauban ato unta nga nasayran kinsa ang namakak tali sa Committee report ug sa iyang mga pamahayag. Sa iyang pagtubag sa mga pangutana sa iyang mga kaubanan ato untang nasukod ang iyang pagka matinud-anon ug pagka inosente sa mga pasangil nga gibato kaniya pinaagi sa atong pagtan-aw sa iyang mga mata ug linihokan. Apan lihay kaayo si Senador Manny Villar busa nagpabilin ang pagtoo sa mayorya sa iyang mga kaubanan nga mikita siya sa proyekto nga iyang gipasiugdahan.

Ang Committee report nga nag ingon nga mikita og 6.2 bilyones ka pesos si Senador Manny Villar tungod sa pag over price sa prisyo sa iyang kayutaan nga naagi-an sa proyekto basi sa 900 ka mga ebidensiya lisod lumpagon sa general statement lamang nga giluwatan sa Senador. Seguro kay lisod tuison ang maong mga ebidensiya kun ipakita kini ngadto kaniya atol sa iyang pagpanubag mao tong misutoy na lang siya ug mibiya.

Kun bakak pa ang unod sa Committee report nga nagpa censure ni Senador Villar nganong wa man niya haronga ug pangutan-a ang komitiba sa mga nahimong basihanan sa ilang findings? Nganong mipaturatoy man hinoon siya sa pagbiya sa session hall? Kay maglisod siya sa pagtuis sa mga ebidensiya kun ugaling iladlad kini ngadto kaniya?

* * *

Giuswag na usab ngadto sa laing adlaw ang bista sa kaso ni PBMA Supreme Master Ruben Ecleo Jr.. Ang pag uktaba sa bista sa iyang kaso nakadugang na usab sa laing tuig sa iyang pag antos isip akusado sa kaso. Bisan tood og kagustohan sa akusado ang pag uktaba sa bista sa iyang kaso apan sigon sa akong nadunggan, gusto na sa mga sakop ug mga opisyal ning misyonaryo niyang grupo nga mahuman na ang pagdungog tungod kay gusto na nilang makuha ang hingpit nga kagawasan sa ilang Supremo.