Nalipay ko pagkasayod nga ang nagdumala sa Land Transportation Office (LTO) diha sa SM City sa North Reclamation Area nangita g’yod og paagi nga maalagaran nila ang publiko.
Kini god nga LTO-branch diha sa SM City gipagamit ra man god ni og luna nga walay abang ubos sa kondisyon nga sila ra usab ang makabutang og drug testing center.
Sama god diha sa dakbayan sa Talisay, Carcar ug sa uban pang bahin sa nasud nga dunay mga proponent nga maoy migasto alang sa pagpangita’g pwesto alang sa LTO.
Ang nagdumala sa LTO diha sa SM City nga akong higala mipahibalo nga aron g’yod maserbisyohan nila ang nagkadaghan nga mga molukat ug kadtong mopabag-o sa ilang lisensya, nangita sila og mas lapad pa nga lugar.
Duol ra usab hinoon kini kaayo sa karaang nahimutangan sa LTO-SM City branch nga anaa sa 3rd level sa mall. Nindot ni kay daghan na nga mga lingkoranan alang sa mga kliyente nga molukat og lisensya.
Unya ang nakanindot pa g’yod diha sa SM City kay gawas nga air-conditioned, wala pa g’yoy fixers nga magsamok-samok. Paspas kaayo ang pag-process sa imong lisensya nga molungtad ra gani og usa ngadto sa duha ka oras.
Ang drug testing center anaa ra sa tupad g’yod sa LTO. Sila si LTO-7 regional direktor Raul Aguilos ug assistant regional direktor Edgar Catarungan motambong sa pagsubo niining maong opisina ugmang adlawa.
Duna diay press conference nga pagahimoon. Busa kamong mga reporters sa newspapers, radyo ug telebisyon adto kamo og pangutana kamo ni direktor Aguilos sa mga isyu nga naglambigit sa LTO.
Ayaw lang hinoon usa tingali pangutan-a sa isyu nga dunay mga sakyanan nga nagparehestro diha sa Lapulapu LTO nga kuwang og dukomento kay naghipos pa ako og dugang mga papeles. Aw hinoon, si Mrs. Aurea Angcay nga maoy hepe sa LTO-Lapulapu nanguros man g’yod nga wala kuno siya’y binuang.
Itambag lang nako ni Mrs. Angcay nga kun tinuod nga walay mga sakyanan nga narehestro sa Lapulapu-LTO nga kuwang og dukomento ubos sa iyang termino, kalma lang ayaw kaayo kabalisa. He! He! He!
Daghan ang mitawag nako ug mimatuod nga buotan g’yod kini si Mrs. Angcay ug dili gusto’g binuang ug gikalipay nako kini. Apan susihon lang g’yod nako ang mga dukomento nga akong nadawat gikan ra usab sa kawani sa LTO.
Kaniadto ra man ko makadungog nga daghang mga sakyanan nga kuwang og dukomento unya maparehestro diha sa Lapulapu apan wala lang nako tagda kay wala may dukomento. Pero karon nakahupot man ko og mga dukomento mao nga higayon na nga akong susihon.
Aw kun makaadto ko sa LTO-SM City ugma ug magkita kami si direktor Aguilos, mo-coordinate kong daan kaniya aron inig-adto nako sa Martes sa iyang opisina paspas na ang pagkuha nako sa ubang dukomento nga gikinahanglan.
* * *
Si Senador Loren Legarga maayo g’yod kaayo nga nanubag sa mga pangutana nga gipasupot ngadto sa mga kandidato pagka bise presidente.
Ang GMA-7 maoy nagpasiugda niini. Kay wala man ko makatan-aw pagsalida niini sa TV kaniadtong milabay’ng semana, naminaw g’yod ko kagahapon sa DYSS-GMA-7.
Nakaingon ko nga samtang ang ubang kandidato pagka bise presidente maayo usab motubag apan tul-id g’yod kaayo ang mga tubag ni Loren sa mga pangutana. Alang nako siya g’yod ang angay’ng himoong ikaduhang pangulo sa nasud.
Sakop man god sa media kini si Loren kaniadto mao nga makalaum nga og tinud-anay nga serbisyo.