Strong signal

MATAGUMPAY ang isinagawang “field testing” ng mga signals ng makinang gagamitin sa makasaysayang automated elections sa Mayo. Dinayo pa ng Comelec ang Pateros, Benguet, Naga, Cebu at South Cotabato upang sampolan kung okey ang mga Satellite signal na mag­ dadala ng resulta mula sa PCOS voting machines sa presinto patungo sa makina sa canvassing centers. Kapag pumalya, may back up cell phone signal na gagamitin.

Malaki ang maitutulong ng ganitong mga programa tungo sa pagpapahinahon sa isang nag-aalalang publiko. Kahit papaano, napatunayan nang makakapagtransmit nga ang mga misteryosong makinang nakikita lang natin sa TV at sa pahayagan.

Pero hindi pa rin panatag ang tao na ang mismong ma­ki­na ay gagana sa pagbasa ng boto sa presinto pa lamang. Paiba-iba ang ulat sa bilang ng balotang naba­basa sa tuwing may hands on demonstration o “mock voting.” Mataas na raw ang 30% o tatlo sa bawat 10 balota. Problema rin ang kakulangan ng exposure ng tao sa ganitong mga PCOS machines.

Bahagi ng mando ng Comelec ang voters education. Subalit kahit pa ito lang ang asikasuhin nila hanggang May 10, hindi magagawang ikutin ang buong kapulungan. Tumutulong sa kampanyang ito ang Parish Pastoral Council for Responsible Voting (PPCRV) sa paghatid kaalaman sa bayan. Ang mga media organizations din ay madalas magtanghal ng televised forum upang kahit sa TV man lang ay magisnan ng manunuod ang prose­song ma-enkuwentro sa presinto sa Mayo.

Ang Pamantasan ng Lungsod ng Maynila College of Law (PLM-CL) ay nakikiisa sa adhikaing buksan ang   mata ng mamamayan upang ito’y maging kapaki-paki­nabang sa pagsiguro ng isang malinis at maayos na halalan. Sa Miyerkules, ikatlo ng Pebrero, 2010, sa pakiki­pagtulungan ng administrasyon ng PLM, ng Comelec at ng PPCRV, ang PLM-CL ay magdadaos ng libreng    voters education seminar para sa mga faculty at mag-aaral ng PLM, complete with hands on demonstration (mock voting) sa smart­matic PCOS machines. Ang mga edukador at isko­lar ng Pamantasan ay uuna­hin dahil sila nama’y nasa posisyon din na mag­hatid ng kaalaman sa mga komunidad sa kamayni­laan.

Bawat isang mamama­yan ay may katungkulang tumulong sa pamahalaan sa ganitong mga pagka­kataon. Huwag na nating hintayin pa na tayo ang la­pitan. Magpadala tayo ng malakas na signal sa kap­wa – na ang magan­dang kinabukasan ay nasa ating mga kamay.