Wa na mopakita sa hawanan sa Senado si Senador Manny Villar human mapagawas ang resulta sa imbestigasyon sa C-5 extention project diin nasuta nga nakakuwarta og binilyong salapi ang Senador. Sa Committee report girekomendar niini nga i-censure si Villar ug ipauli niya ang 6.2 bilyones ka pesos nga iyang nasapi sa proyekto.
Nasuta usab sa imbestigasyon nga gituyo sa pagpaliko ni Senador Manny Villar ang C-5 road extention project ngadto sa iyang mga yuta aron kini makakuwarta. Sa mao gihapong imbestigasyon nakita usab nga gipasobraan sa Senador ang prisyo sa pagpalit sa iyang mga yuta hinungdan nga mikita kini niini og 6.2 bilyones ka pesos.
Ning bag-o gibulgar ni Senate President Juan Ponce Enrile nga gisuwayan siya sa pagsuborno ni Villar aron mopabor niini ang resulta sa imbestigasyon apan wala siya magpadala niini.
Si Senador Villar wa motunga sa Senado aron atubangon ug paminawon ang report sa komitiba nga nag-imbestigar kaniya tungod kay iya kining gihulagway nga usa ka Kangaro Court, gihukman na kuno siyang daan niini.
Talawan man diay ni si Manny Villar, motago man kun naa nay resulta sa imbestigasyon sa reklamong iyang giatubang. Ang iyang pagtago nagpasabot lamang sa iyang pagka sad-an. Ang inosente ugod nga tawo ug walay sala sama sa lion kaisog nga makig-atubang sa mga namasangil kaniya apan ang tawong sad-an di nimo makit-an.
Si Senador Villar gipatilaw lang sa panahon aron siya makahinumdum ug makaamgo nga sayop diay ang iyang gihimo kaniadto sa dihang siya pa ang Speaker of the House diin iyang gimaniobra ang impeachment complaint batok ni Erap Estrada. Magpasalamat gani si Senador Villar nga ang iyang gihulagway nga Kangaro Court mihatag kaniya og kahigayonan nga makadepensa sa iyang kaugalingon pero iya lang gibalibaran, di sama sa iyang gibuhat ni Erap kaniadto nga iya lang gideritso.