Dili tanang kawani ug opisyal sa gobiyerno mga kurakot, kawatan ug tikasan. Kini bisan paman sa kadaghan na sa mga reklamo, isyu, kontrobersya nga gikalambigitan sa mga opisyal sa gobiyerno ug bisan na mismo kang Presidente Gloria Macapagal Arroyo.
Naa na ang NBN-ZTE Broadband deal, ang Hello Garci, ang C-5 Project, ug uban pa nga sa kadugayan nakapasamot og kabati sa panan-aw sa publiko ug sa international arena nganhi kanato.
Kini gumikan usab kay atong gipatuyangan og tabi apan wala kaayo kitay gihimo aron kini puohon. Unta ang mosunod nga pangulo sa Pilipinas mas tarong pa kun itandi sa nangaging mga administrasyon.
Kanang pangulo nga di mahadlok mounay og papriso sa iyang mga higala, kabanay ug uban pang masakpang mangawat, aron kini makab-ot kinahanglang paspas, decisive ug makiangayon ang atong mga hukmanan sa paghusay sa mga kaso.
Unta kadtong mga sad-an modawat usab sa ilang kasaypanan aron wala nay samok, angayang magbaton sila og kaisog nga atubangon ang silot ug mauwaw sa ilang kaugalingon ug sa ilang mga pamilya nga ilang nabuhat ang maong salaod, aron usab bisan paman sa ilang salaod nga nahimo duna pa gihapoy maluoy kanila.
Dili kita angayang motuong wala nay paglaom ang mga Pilipino gumikan sa wala'y kasulbarang kurapsyon sa mismong gobiyernong gitahasan pagdumala sa nasud.
Tungod kay bisan paman sa mga nanggawas nga mga isyu, kontrobersya sa mga opisyal sa gobiyerno angayang atong hinumduman nga gamay ra ni sila kumparar sa kinatibuk-ang gidaghanon sa mga empleyado sa gobiyerno.
Dili ikalimod nga matag usa kanato duna gyu'y nailhan o ba kaha nasayran nga kining usa ka opisyal o empleyado sa gobiyerno nalambigit sa kurapsyon ug uban pang kahiwian.
Apan wala kini magkahulugang tanang empleyado o opisyal sa gobiyerno karon pulos mga kurakot. Dili lang kay duna, kondili mas daghan pang kawani sa gobiyerno ang pabiling matinud-anon sa ilang trabaho bisan paman sa kagamay sa ilang sweldo.
Kini mao ang mga ordinaryo natong street sweepers, traffic enforcers, kapolisan, sundalo, maestro ug maestra, mga hukom, public doctors, mga ordinaryong panday ug mason ug daghan pang uban.
Maong dili makiangayong isipon nga pulos gyud kurakot ang naa sa gobiyerno.
Kay kun kurakot pa gyud ug wala nay tarong diha sa gobiyerno sukad pa kaniadto, dili gyud mahitsas ang usa ka nasud. Wala'y sistemang mosaler, gubat diri-gubat didto. Wala'y kawatan o killers nga dakpon, wala'y enforcers nga mobantay sa trapiko, wala'y magtutudlong moagwanta og saka sa bukid aron motudlo sa mga batang taga bukid ug uban pa.