Cerge Remonde

Ilabina dinhi sa Sugbo, naukay ang nasud gumikan sa kalit nga kamatayon ni Press Secretary Cerge Remonde. Nadawat nako ang text message gikan ni Dr. Dave Baron, kapikas sa akong pag-umangkon, alas 12:05 nagtaho sa kamatayon ni Cerge, alas 11:55.Samtang wala'y rason nga komedyahan ko ni Dave sa maong matang nga komedya, wa ko motuo dayon.

Mi-text ko sa atong mga kauban sa media, sama kang Nito Jabat pagpa-confirm, kay di sad ko gustong magpahibawo sa uban, hangtud matino ang tanan. Tuod man, gi-confirm ni Nito Jabat, tapus tawgi sa Freeman ang Malacañang. Ingon man, mi-confirm usab ang uban natong mga kauban sa media.In minutes, nahibawo dayon ang tibuok nasud sa pagkamatay ni Cerge.

Indeed, nakalitan ang tanan. Matud pa, nag-andam kuno si Cerge sa usa ka press conference nga pagahimoon niadtong adlawa, sa dihang giatake siya sa sakit sa kasingkaisng.

Ang panag-ila ug panaghigala namo ni Cerge nagsugod sa usa pa siya ka ordinaryong reporter, columnist sa The Freeman, ug commentator/Manager sa DYLA.

Samtang dili nato matawag nga suod kaayo ang among panaghigala, sama sa ilang ka suod ni Choy Torralba, apan, bisag asa mi magkita, motagad gyud to siya nako sa usual niyang tinagdan: mohangop ug mogakos. Kini, bisan sa diha na siya nahimutang sa hataas nga puwesto sa kagamhanan.

Labing katapusan namong kontak, mao nga sa diha nga dunay nakahunghong nako nga si Executive Secretary Ermita, mo-resign kay molansar, ug siya si Cerge ang ipuli pagka-Executive Secretary, ako siyang gipangutana kun tinuod ba, ug gi-congratulate in advance. Mitubag dayon siya, ug gi-deny ang gihunghong ngari nako. Matud niya: “Wala yan, Lin!” Akong gisukmatan ang naghunghong nako, ug mitubag nga “huwat lang ta.”

Lain namong contact, mao nga tapus sa usa ka presscon bahin sa massacre sa Maguindanao, ako siyang gi-textan nga maayo niyang pagka-handle ang maong presscon. Nagpasalamat siya, ug tungod kay na-delete tingali ang akong ngalan sa iyang directory, nangutana siya kun kinsa ako. Wa na lang ko magpaila, ako lang siyang gitubag nga: Kababayan mo sa Cebu.

 Unya, usa sa natabang ni Cerge sa mga senior citizen sa Sugbo, mao ang iyang pag-intercede nga kahatagag pagtugot ang United Senior Citizens Multi-Purpose Cooperative of Cebu City pagbaligya og bugas sa NFA.

Ingon man, mga yangongo ni Kapitan Dodo Abella, isip national president sa Federation of Senior Citizens Associations of the Philippines, Inc., iyang ipaagi ni Cerge aron dali nga matagad.

Cerge: gikasubo namo pag-ayo ang kalit mong pagtaliwan ngadto sa laing kinabuhi.