Sama sa nangaging mga Sinulog, ang Sinulog 2010, despite sa pag-ulan-ulan, nagmalampuson usab kaayo. Earlier estimate sa crowd, dul-an sa 10 milyones. Sa ato pa, matag tuig nagkanindot ang Sinulog. Ug mao na say atong lantawon ang Sinulog 2011, uban sa pipila ka pahinumdom.
Apan, una sa tanan, nalipay kaayo kong nagtan-aw sa presentation sa Lumad Basakanon diin ilang gi-revive ang official seal sa Sinulog. Ambut ngano nga tapus sa pila ka tuig, gikan sa pagsugod sa Sinulog, wa na man tagda sa Sinulog Foundation ang official seal niini.Gingil-aran tingali sila, nga gitun-an kini’g maayo, gihimo ang makoti nga pag-research, una mamugna ang seal sa Sinulog. Mao nga nalipay kaayo ko’g daku nga gibanhaw kini sa Lumad Basakanon.
Una kini natong ipahinumdom nga sa Sinulog 2011, atong banhawon ang official seal sa Sinulog. Ikaduha, atong ipahinumdom pag-usab nga ang Sinulog dili mardi gras.
Sumala sa Lexicon Webster Dictionary, ang kahulogan sa mardi gras: “Shrove Tuesday; the last day of a carnival celebrated in Paris, New Orleans and other cities.” Carnival ba god ang Sinulog?
Ug unsa man ning Shrove Tuesday? Ang Collins Gem Dictionary nagkanayon: “day before Ash Wednesday.” Sa ato pa, Martes Santo, sa dili pa ang Miyerkules sa badlis, diin pahinumduman ang tawo nga bisan unsa siya ka gamhanan ug kadaghan sa kwarta (kinawat o dili), bisag di siya gustong manaug sa gahom, sa abog siya pauli.
Mao kini ang kahulogan sa mardi gras. Nganong ma-mardi gras man ang Sinulog? Aron lang gyud ingnon nga nindot tang mo-Inengles?
Ato sang ipahinumdom dinhi nga ang Sinulog lahi sa Ati-Atihan, lahi sa Dinagyang. Sa ato pa, dili maskara, dili hugawhugaw sa nawong. Pure Cebu kini. Di kinahanglan moawat kita sa ubang celebration. Mao kini ang naka-unique sa Sinulog. Maoy hinungdan nga dugokon kita dinhi sa minilyon nga mga devotee sa Santo Niño, ug mga turista.
Laing pahinumdom mao nga ang Sinulog namugna (ambut nganong si Boy Odilao ra man gyu’y nakahunahuna niini), agi’g paghatag og socio-cultural aspect sa religious celebration, nga karon nahimo nang tourist attraction ug dakung festival sa mga Sugbuanon.
Sa ato pa, dili nato hikalimtan ang hinungdan nganong dunay Sinulog. Ug nalipay kita nga ato kining mapakita matag saulog sa Piyesta Senyor, kay mao may atong unahon ang religious aspect sa kasaulogan. Mao man gani hinungdan nga bisa’g matumog na kita sa ulan, padayon ang atong pagdebosyon sa Sto. Niño.