Sa imong maayong paglabigar

Mingitngit pagkalit ang kalibutan sa mga suod ug nagmahal ni Press Secretary Cerge Remonde human mabati ang balita sa iyang pagtaliwan ngadto na sa laing kalibutan kaniadtong Martes.

 Daghan ang gianognan sa iyang kalit nga pagtaliwan. Si Pangulong Arroyo wa makatingog dihang iyang nabati sa pikas linya sa telepono ang tingog sa nagpahibalo sa kamatayon sa iyang tigpamaba. Si Executive Secretary Eduardo Ermita miingon nga usa ka dakong kawalan sa kagamhanang Arroyo ang kamatayon ni Cerge Remonde.

 Si Gobernadora Gwendolyn Garcia ug Mayor Tomas Osmeña naghisgot sa dakong tabang nga natampo sa kalihim sa ilang mga gipangayong proyekto sa Malakanyang. Ang mga pribadong tawo, mga police ug labi na ang mga sakop sa media diin nagagikan si Secretary Cerge Remonde mipadayag usab sa ilang mga kasinatian ug kaayo sa sekretaryong mitaliwan.

 Pagkasayang. Daghan pa unta seguro siya’g mahimo sa mga Sugbuanon ug sa tibuok nasud. Apan lagi kay kining atong kinabuhi hinulaman man lang gikan sa kahitas-an mao nang ang kalit niyang pagbiya pihit na lamang natong dawaton ug ihangad ta na lang sa langit ang atong mga kaguol.

 Matud pa sa balaang kasulatan, ang kamatayon sama sa usa ka kawatan nga mokalit lag abot nga di nimo mahibaw-an. Mao ni ang nahitabo ni Secretary Cerge Remonde. Kinsa bay magtoo nga mamatay diay siya kaniadtong Martes nga lagsik pa man kaayo ang iyang lawas.

 Gikan kanako, sa akong asawa nga si Nora ug mga anak kami manghinaut nga maayo unta Ninong ang imong paglabigar diha sa lain nang kalibutan.