Alang kanimo Cerge

Naguol g‘yod kaayo ko ug nakalitan sa pagkasayod nga namatay si Press Secretary Cerge M. Remonde.

Suod kaayo nako si Cerge kay dihang mipahawa si Leo Lastimosa pagka news director sa DYLA, ako maoy gitudlo niya nga news director basi sa rekomendasyon ni Leo.

Ubos sa iyang management, kay si Cerge man maoy among general manager kaniadto sa Vimcontu Broadcasting Corporation, nakakat-on ko unsay trabaho isip department head.

Bilib kaayo ko ni Cerge kay hilabihan ka maayo niya nga mo-manage og kompaniya. Kun duna siya’y ipatawag nga miting kanamong mga sakop sa DYLA, kami g’yod nga tanan motambong.

Kaming tanan nga mga empleyado kuhaan g’yod niya og mga pamahayag sa among monthly meeting, gikan sa janitor hangtud sa mga department head aron pagsuta kun unsay mga problema.

Isip news direktor kaniadto, dili g’yod ko magpanuko nga mohimo’g sugyot nga tan-aw nako makaayo sa among news operation ug iya g’yod kining aprobahan, apil na ang pagpa-increase sa sweldo sa mga reporters.

Dili usab siya magpanuko pagtabang sa iyang mga suod. Dihang nagplano ko nga mopalit og sakyanan kaniadto, iya ko nga gipahuwam og kwarta.

Dihang misuway ko paglansar isip konsehal sa usa sa mga barangay dinhi sa dakbayan niadtong 2007, iya usab ko nga gihatagan og financial support.

Ang kabisi hinoon niya sa trabaho ni Cerge maoy rason nga dili na kaayo siya makatubag sa tanan nimong mensahe.

Kaniadtong Sabado, miapil siya sa among coverage sa fluvial procession ug mibisita sa DYLA. Nagpapalit pa gani siya’g litson para sa paniudto niadtong Sabado, nakaapil pa gani ko, apan wala na kami magkita.

Ang sipyat nako mao nga wala ko maninguha nga magkakita kami si Cerge sa pagpauli niya dinhi sa Sugbo kaniadtong weekend. Kun nasayod pa ko nga kutob na lang gahapon ang iyang kinabuhi, naninguha g’yod unta ko nga magkakita kami.

Magkakita pa hinoon kami, kun dad-on na dinhi sa Sugbo ang iyang patay’ng lawas, apan mao lagi dili na kami mahimong magkasulti pa.

Ako na lang iampo nga mahilangit unta ang kalag ni Cerge ug nga ang iyang mga mithi nga pagkamahigalaon manakod unta sa uban.

* * *

Dunay Koreano nga “drug pusher” nadakpan sa kapolisan sulod sa usa sa mga kwarto sa Waterfront Cebu City Hotel kagahapon sa kaadlawon.

Angay’ng pasalamatan sa maong kalampusan si Greg Dealagdon nga maoy mi-coordinate dayon kanila ni SPO1 Francisco Balansag ug kaubang polis aron madakpan ang langyaw’ng drug pusher.

Pag-abot sa mga polis didto sa lawak sa Koreano sa hotel, napulo na lang ka paketeng shabu ang nahabilin. Si Greg maoy nakakuha og inpormasyon sa kalaki niining Koreano nga drug pusher mao nga wala siya maglangan, iya dayong gi-report sa iyang mga higala nga polis.

Tuod man dakpan. Nahinumdom ba kamo ni Greg, kadtong akong gipahibalo nga kandidato pagka mayor sa Aloguinsan? Siya kini nga Greg nga maoy mireport sa kalihukan sa maong Koreano.

Nakaingon ko nga kun pilion sa taga Aloguinsan si Greg, mapaabot nato ang hugtanay g’yod nga kampanya sa illegal nga drugas diha sa Aloguinsan.

Ang maong report sa pagkasikop sa Koreano, anaa na-blotter sa Mabolo police station.