EDITORYAL - P45 mil nga suweldo giilogan

Pipila sa mga kandidato pagka-Presidente mogasto og minilyon ka pesos aron lang mailog ang puwesto diin ang suweldo mokabat lamang og P45,000 ang buwan.

Mas dako pa man gani ang suweldo sa pipila ka mga sakop sa media didto sa kaulohan.

Nganong mogasto mag ingon ana ka dako? Nag-uros-uros ba gayud ang gana sa pagsilbe sa nasud?

Kun mao, angay’ng pahalipayan kadtong mga kandidato nga mogasto og minilyon sa ilang kaugalingon nga kuwarta alang sa nasud bisan kun ang suweldo sa pagka-Pangulo P45,000 ra kada buwan.

Apan daghan ang wala o dili motuo nga dili mangitag paagi ang mananaug nga mabawi ang iyang gasto sa kampanya.

Pasayloa kining mga madudahon. Apan unsaon man nga mao man gyud ang ilang pagtuo basi sa matang sa pamolitika dinhi sa ato.   Ni Juanito V. Jabat