Comelec watchlist

Gipahibawo sa kadagkuan sa Commission on Elections nga labing minus unom ka mga dapit sa rehiyon ang girekumendar sa kapolisan ug militar nga ipaubos sa watchlist sa Commission on Elections alang sa umaabot nga eleksiyon tungod sa giingong presensiya sa mga rebelled, private armies ug panagbangga sa mga lig-on nga mga kandidato.

Ang regional director sa Comelec nga si Atty. Rey Rene Buac mitug-an nga ang rekumendasyon gihimo sa mga station commanders atol sa unang security briefing nga ilang gihimo niadtong Miyerkules sa hapon.

Matud ni Buac nga ang unom ka mga lungsod nahimutang sa Sugbo, Bohol ug Negros. Nagdumili hinuon paghatag og detalye si Buac pila niini ang ania sa Sugbo, pila sab ang tua sa Bohol ug Negros. Ang iya lang gipaniguro nga sa pagkakaron wa pay rekumendasyon gikan sa Siquijor.

Si Buac mipasabot nga ang rekumendasyon gibasi ni sa intelligence report sa kapolisan ug militar nga posibling dunay kagubot nga motumaw sa umaabot nga eleksiyon sa maong mga dapit tungod sa mga armadong tawo ug sa kainit sa panag-atbang sa mga gamhanang politico.

Giklaro hinuon ni Buac nga subject pa alang sa dugang verification ang maong rekumendasyon. Nagdumili sab si Buac pagtug-an kun lakip ba sa unom ka mga dapit nga girekumendar nga mapaubos sa watchlist ang dakbayan sa Bogo.

Si Kongresista Benhur Salimbangon sa kwarto distrito mipahibawo sa iyang tinguha nga mapaubos sa Comelec control ang Bogo o ba kaha ang tibuok distrito alang sa umaabot eleksiyon. Kini tungod sa iyang giingong mga goons nga gibatonan sa iyang kaatbang.

Namasangil si Salimbangon nga ang mga membro sa City of Bogo Anti-Crime Task Force posibling gamiton sa mga Martinez pagpanghasi sa iyang mga suporters tungod kay ang uban niini mga ex-convicts.

Si Buac miingon hinuon nga wala pa sila makadawat og opisyal nga reklamo kalabot niini. Wa say report gikan sa election officer o ba kaha sa hepe sa kapolisan sa maong dakbayan kalabot niini. Gipasalig hinuon ni Buac nga ilang susihon unsa ka tinuod ang maong pasangil, apan matud niya mas maayo og moduso gyud og reklamo si Salimbangon ug dili lang kay adto sa media magyawyaw.

* * *

Unsa may nahitabo sa kampanya sa Ombudsman batok sa dili hustong paggamit sa mga sakyanan sa gobyerno?

Dili na maihap ang mga kaso nga akong giduso sa Ombudsman nga naglambigit paggamit sa mga sakyanan sa gobyerno alang sa personal nga katuyoan sa mga opisyal. Apan wa gyu’y abiso ang maong buhatan unsa nay nahitabo sa maong mga kaso.

Hinaut nga wala lang gamita ang paglusad sa “Oplan Red Plate” sa pagpasikat ni Deputy Ombudsman Pelagio Apostol. Nahinumdom man gud ko niini tungod kay sulod sa pipila na ka semana nakong naobserbahan ang pagpahimulos sa usa ka department head sa Kapitolyo sa sakyanan sa gobyerno sa personal niyang kagamitan.

Gihatagan ko lang og igo-igong panahon aron hunongon ni Marivic Garces, hepe sa Provincial Social Welfare and Development ang iyang pagpahimulos sa sakyanan nga giisyu sa Kapitolyo niya. Apan wala gyud magbaton og uwaw ug dilikadisa ang maong opisyal sa iyang paghimo sa sakyanan sa gobyerno nga school bus nga mohatud sa mga bata matag buntag ngadto sa tunghaan.

Gawas nga gigamit ang KIA Carens nga giisyu sa gobyerno kaniya paghatud, ambot iya bang mga anak o pag-umangkon, ngadto sa eskwelahan drayber pa gyud sa Kapitolyo maoy gihimong daw family driver.

Tugotan lang ba ni sa kadagkuan sa Kapitolyo nga pahimuslan sa ilang mga opisyal ang ilang katungdanan? Dili ba lang ni imbistigahon sa committee on discipline sa probinsiya?

* * *

[email protected]