Panglutos sa kontra

Dungan sa pagbukal sa kaldero sa politika dinhi sa Sugbo nunot sa nagsingabot nga eleksiyon karong Mayo mao ang paglutaw sab sa karaang batasan sa mga trapo nga mga politiko.

Pagpanglutos sa mga kontra ug pagbabag sa mga proyekto aron kapugngan nga makapuntos ang ilang kaatbang ngadto sa kasing-kasing sa mga botante.

Tungod sa karaang batasan sa pamolitika katawhan ug mga kabus maoy naapeki. Gikalimtan sa mga trapo nga mga opisyal ang hinungdan nga sila nagpapili sa pwesto nga ila karong gihuptan mao ang pagpangalagad sa katawhan ug dili ang pagpadatu sa ilang kaugalingon ug paghimong misirable sa mga kinabuhi sa ilang mga kaatbang sa politika.

Sa miaging semana nagpuli-puli og hakop sa headlines sa mga mantalaan ang panag-ilog nilang Kongresista Nerissa Soon Ruiz ug Mandaue City Mayor Jonas Cortes kinsay mosemento sa usa ka karsada diha sa barangay Ibabao.

Laing dakong balita nga mihakop sab sa headline mao ang pagbawi ni Gobernador Garcia sa mga office equipment nga gidistino didto sa buhatan ni Bise Gobernador Gregorio Sanchez, Jr. ug ang wala na pag-renew sa siyam niya ka mga consultants.

Gipugngan sab ang P23 milyones nga legislative assistance fund alang ni Sanchez hinungdan nga dili na kapatuman sa iyang mga proyekto ang bise gobernador.

Kagahapong adlawa nagbansiwag sa mantalaan ang balita sa giingong pagbabag ni Mayor Tomas Osmeña sa mga hinabang gikan ni magpapatigayon Atan Guardo alang sa mga biktima sa sunog diha sa A. Lopez.

Ang maong mga panghitabo makapahinuklog tungod kay kining tanan timailhan sa pagkahanaw na sa hingpit sa mga maayong hiyas sa atong mga politiko.

Timailhan ning tanan unsa ka dunot na ang atong sistema nga lakip ang kinaiya sa atong mga politiko hinay-hinay nga gilamoy sa kadautan. Nawad-an na sa pamaayong paminsar ang atong mga politiko nga dili na maantigong mohuna-huna unsay husto ug makiangayon nilang buhaton.

Pananglitan, dili husto ug makiangayon ang pagbabag ni Cortes sa proyekto nga gisugdan ni Ruiz tungod lang kay duna na sila'y pundo nga gigahin pag-ayo sa maong karsada.

Ang husto ug makiangayon mao ang paggamit sa ilang pundo pag-ayo sa laing gubaon nga karsada diha sa Mandaue.

Dili ba gud dakong hinanggaw ang pagpahunong sa gisugdan na nga proyekto tungod kay gusto tang kita maoy mopatuman aron maangkon ang kredito?

Sa pikas bahin “bad taste” ang gihimo ni Gobernador Garcia nga pagtangtang sa mga consultants sa bise gobernador ug pagpugong sa iyang legislative aid fund niining panahon sa eleksiyon.

Samtang tinuod way illegal sa iyang gihimo, apan ang pangutana makiangayon ba kini labi pa nga siya ug ang iyang runningmate nga si Glenn Soco nga dili gani opisyal sa Kapitolyo mao na hinuoy nagpahimulos aron pagduso sa iyang kandidatura.

Inay si Sanchez maoy angayang ikauban ni Garcia pagpang-apud-apod sa mga hinabang ug proyekto gikan sa Kapitolyo sanglit sila mang duha ang pinili sa katawhan, si Soco naman hinuon maoy katambayayong sa gobernador.

Dili illegal apan ang panguta husto ba ug makiangayon? Dinhi sa dakbayan, ang negosyante nga si Guardo bisan dili public official apan migamit sa iyang kaugalingong kwarta pagtabang sa mga kabus. Apan inay pasalamatan sa dakbayan tungod sa pagpuno sa mga kakuwangan sa gobyerno gikasilagan hinuon sa mayor.

Ang bati kay gibabagan pa ang mga hinabang alang sa mga kabus ug biktima sa katalagman.

Dili ba mahimong mag-atbang sa politika nga dili gamiton ang karaan ug trapo nga pamaagi?

Nganong dili man batnan sa atong mga politiko ang batasan sa usa ka tinud-anay nga kristohanon? Dili kinahanglan nga gukdon ang mga kaatbang aron makabintaha ug modaog sa eleksiyon. Ipakita lang nga takus ka ug dili tigpakaaron ingnon sigurado ko nga maangkon mo ang suporta sa katawhan.

* * *

[email protected]