Taronga ninyo'g pili

Ang pag-insister sa kampo sa oposisyon sa dakbayan sa Lapulapu nga ipa-ubos sa Comelec control ang maong malinawong siyudad maoy nagtukmod kanila pagpangita og mga scenario aron paghulagway nga bayolente ang maong lugar ilabi na panahon sa piniliay.

Bisan unsaon og insister ni Konsehal Junard “Ahong” Chan nga ‘politically motivated’ ang pagpamanhig-patay kang Allan Berame sa tuyo nga makontrolar sa Comelec ang dakbayan karong Mayo nga eleksiyon, dili kini molampos tungod kay ang mga residente sa Lapulapu nasayod nga malinawon ang dakbayan. Si Sr. Supt. Mariano Natuel, ang hepe sa Lapulapu City Police Office ug si Judith Berame, ang asawa ni Allan Berame, nagkahiusa sa ilang pagtuo nga “love triangle” ang motibo sa pagpamanhig-patay kang Allan Berame.

Si Allan Berame kauban sa usa ka Marites Amit nga giingong pinanser sa Casino-Mactan, sa dihang gibanhigan. Naluwas si Amit, apan patay si Berame.

Ang asawa nga si Judith nagtuo nga ang iyang bana nga si Allan ug si Amit adunay relasyon.

Si Allan usab naila nga usa ka “bagis” nga tawo sa Lapulapu. Aduna usab siya'y mga kontra.

Apan nganong pugson man gyud sa oposisyon pagtuyok ang estorya nga ang kamatayon ni Allan Berame tungod sa away sa politika sa Lapulapu?

Nganong nanghambog man si Ahong Chan nga iyang lider si Berame nga job order man diay kini sa Lapulapu City Hall, sumala pa sa balita sa usa ka radyo. Ang iyang asawa nga si Judith hepe usab sa Clean and Green Program sa Lapulapu.

Nakadungog usab ko og balita nga ang kampo ni Ahong Chan nagpadala og tolda nga gibutangan niya’g ngalan ug ipataod unta sa haya ni Allan Berame, apan gipatangtang ni Judith Berame ug ang iyang gipataod ang tolda sa City Hall.

Kun tinuod nga lider ni Ahong Chan si Allan Berame, nganong gipatangtang man sa kapikas ni Allan ang iyang tolda?

Kun ubos pa sa JO sa Lapulapu si Allan Berame, hepe sa Clean and Green Program ang iyang asawang si Judith, unya wala dawata ang ilang tolda aron itaod sa haya, ipamugos gihapon nilang ilang lider si Allan Berame?

Aron iinsister nga politically-motivated iyang kamatayon?

Aron iinsister sa Comelec nga ipaubos sa ilang control ang Lapulapu?

Pag-sure kamo oy!

* * *

Ang naghinobrang hambog sa Kapitolyo mi-ani og kasuko sa mga tawo sa lalawigan.

Inay mo-sempatiya kang Gob. Gwen Garcia ug sa iyang tigpamaba Atty. Rory Jon Sepulveda ang mga tawo sa kalungsoran, naka-amgo hinuon sila unsa diay ka-guilty ang gobernador sa mga isyung gitampok ngadto kaniya ilabi na sa overpricing nianang kontrobersiyal nga Cebu International Convention Center (CICC) nga padayong giimbestigar sa Ombudsman Visayas.

Nasayod na hinuon ang publiko nga igo ra gyud diay’ng nanghadlok ang Kapitolyo sa mga sakop sa media aron mo-undang na kini pagsabasaba kalabot sa pag-impluwensiya ni Garcia sa fact-finding investigation hinungdan nga hangtod karon wala gihapoy resulta nga gipagawas ang Ombudsman ug migawas hinuon ang estorya nga si Deputy Ombudsman for the Visayas Pelagio Apostol mimando sa imbestigador nga mangita og ebidensiya aron i-absuwelto si Garcia.

Dili unta angay tukbon ang paon sa Kapitolyo. Apan daghan sa among mga kauban wala makauyon sa panghulga ni Sepulveda ug mideklarar hinuon sila og gubat batok sa Kapitolyo.

Sa dihang giawhag si Sepulveda paghingalan sa lima ka mga sakop sa media nga giingon niyang kritikal kaayo kang Garcia, mi-uk-ok hinuon kini ug nanghambog pa nga dili na kinahanglang hinganlan pa sila kay basin kuno unya og misikat; ug nanghilom na usab sila.

Pastilan! Hambugero!

Ang maayo ni Sepulveda tinud-on niya iyang bahad. Kay bisan unsaon niya sa pagbahad kaming mga sakop sa media, dili kami motak-om sa among baba sa pagtuki ug padayon nianang gisudlan nga kontrobersiya ni Gwen Garcia. Akong balikon akong awhag nilang Gwen Garcia ug Sepulveda, kun gusto nilang dili sila hisgotan sa publiko pinaagi sa media: pamahawa kamo diha sa Kapitolyo!

Unsa man diay gusto ninyo diha sa Kapitolyo, bisan tataw na kaayo nang inyong mga binuhatan, mohilom lang ang publiko?

Maayo gani kay adunay media, kay kun wala pa, hasta na seguro nang Kapitolyo gibaligya na.

Gipamawi naman gani ang mga yuta sa lalawigan nga ania dinhi sa siyudad aron ipamaligya sa mga pribadong negosyante.

Tan-awa gud ninyo nang luna diha sa M. Velez street nga iya sa lalawigan, gibawi na usab sa Kapitolyo. Ang makaluluoy mao ang Department of Agriculture nga anaa mag-opisina ug naghimutang sa mga agricultural laboratory diha sa maong luna.

Wala hatagi og igong panahon sa Kapitolyo ang Department of Agriculture hinungdan nga nanghilak intawon ang mga opisyal sa maong ahensiya nga namutos niadtong miaging semana. Unsa man ang tuyo sa Kapitolyo sa luna sa M. Velez, sa luna sa Centcom, sa luna sa TESDA, sa mga luna nga ubos sa Ordinance 93-1? Ipamaligya sa mga negosyante unya pahawaon lang ang mga pobre ug ang mga ahensiya nga nag-opisina?

Nalambigit na diay sa real estate business ang Kapitolyo mao nga ang mga basic services sa mga kalungsoran nanghibiyaan na.

* * *

Na hala, kamong mga botante sa kalungsoran hunahunaa gyud ninyo pag-ayo kinsay inyong isulat unya sa balota. Pilia ninyo kanang dili corrupt, wala'y isyu nga giatubang ug limpyo ang pagkatawo.