Deboto ni Sr. Sto. Niño nakugang pagkahibawo nga di na maapil ang iyang ngan sa electronic billboard sa Pilgrim Center sa Basilica del Sto. Niño. Sa nangaging mga Piyesta Senyor, ang iyang amot nga P500 makapahimutang na sa iyang ngan sa listahan sa mga nitampo.
Apan sa niaging semana, giingnan siya sa kadagkoan sa Basilica nga P1,000 na ang minimum nga amotan. Aron makita ang iyang ngan sa tanang manimbahay. Kun di kaabot og P1,000 ang iyang amot, igo na lang siyang pasalamatan. Apan di na maapil sa electronic billboard ang iyang ngan.
* * *
P1,000 unta ang iyang giandam karong tuiga. Mas dako kay sa naandan niyang P500 nga amot sa nangaging Piyesta Senyor. Apan ang P1,000 alang unta nilang duha sa iyang anak. Nga may gipangayo sab ni Sr. Sto. Niño.
Nalain man siya sa pagdoble sa minimum nga amot, wa na lang gyod hinuon siya moamot. Nireklamo sa iyang kahigalaan nga nasobrahan nang panguwarta sa Basilica. Ang iyang kahigalaan nisumbong sab sa Arangkada sa DYAB Abante Bisaya. Nangutana sila makiangayon ba ang bag-ong lagda.
Alang nako, katungod sa Basilica ang pagtakda og lagda unsa nga mga ngan ang maapil sa ilang electronic billboard. Lisod tingaling ilista ang tanan. Apan di ko andam nga modupa sa iyang pagpasaka sa minimum nga amotan.
* * *
Kadudahan sab ang tuyo sa deboto. Unsa man diay tuyo sa iyang nangaging mga pag-amot? Aron makatabang sa Piyesta Senyor? O aron magbansiwag ang iyang ngan? O nagtuo siya nga mas dako ang kahigayonan nga mahatag ni Sr. Sto. Niño ang iyang gipangayo kun makarga ang iyang ngan sa electronic billboard sa Pilgrim Center?
Ang mga manimbahay sa Pilgrim Center nga mohatag sa ilang amot atol sa mga santos nga misa di mahitabong maapil sa electronic billboard. Kay, bisan pa tingali kun mas dako pa sa P1,000 ang ilang amot, wa may kahigayonan nga malista ang ilang ngan. Kang kinsa mang amot ang mas makahuloganon? Kang kinsa mang pangilaba ang mas dunggon?
* * *
Ingon ini kalisod tugkaron ug ipasabot sa mga ritwal sa simbahan. Apil na sa Piyesta Senyor. Ang mga pangu sa ubang mga relihiyon, nga mahimong nasina sa minilyon ka mga deboto ni Sr. Sto. Niño, nitataw nga di kinahanglan nga maghuot ang katawhan sa Basilica kay mahimo man silang mangaliya sa ubang mga simbahan. O bisan sa ilang kaugalingong pinuy-anan.
Unsaon man nimo pagpasabot ang deboto nga kumbinsido nga mahimong mas makahuloganon ang iyang amot kun makit-an sa tibuok Pilgrim Center ang iyang ngan? Mas lisod alang sa kaparian sa Basilica del Sto. Niño ang pagpatin-aw nganong ang mga makaamot lang og P1,000 ang maapil sa listahan nga makita sa kadaghanan?
* * *
Email: leo_lastimosa@abs-cbn.com