Sama sa iyang pagluwas sa atong katiguwangan gikan sa mga epidemiya ug ubang katalagman sa karaang panahon, si Sr. Sto. Niño mahimong mao na say moluwas nato gikan sa mas dakong kadaot tungod sa pagkagusbat sa kinaiyahan. Sa labing unang higayon sa kasaysayan sa Piyesta Senyor sa Sugbo, usa sa mga misa sa nobenaryo ang ipahinungod sa pagpanalipod ug pagpalambo sa kinaiyahan.
Sa labing unang higayon sab, nahukman sa kaparian sa Basilica del Sto. Niño nga mas palapdan ang pagsaulog sa Piyesta Senyor. Lapas sa ilang makasaysayanon nga nataran. Ug ngadto sa lagyong mga isla sa Kabisay-an nga labing adunahang tinubdan sa katigayonan sa kadagatan ug mao say labing nahulga sa ilegal nga kalihokan.
* * *
Matud sa kadagkoan sa non-government organizations (NGOs) nga nangampanya batok sa ilegal nga pangisda sa Sugbo ug kasilinganang mga lalawigan napakyas sila pagkumbinser sa mga mangingisda nga hunungon nang ilang paghilo ug pagdinamita sa mga isda. Gitumbok sa mga mangingisda ang kalisod sa ilang panginabuhi nga maoy nakapugos nila pagdangop sa ilegal nga kalihokan.
Apan dihang nagpatabang na sila sa kaparian sa Basilica, labi na nga gida sa kaparian ang milagrusong imahen ni Sr. Sto. Niño, nadapit nila ang pagtagad sa kasagaran sa mga mangingisda. Ang pipila nga nipalabi sa kagahi sa ilang mga ulo, gibaraw na sa ilang kaugalingong mga asawa ug mga anak.
* * *
Ang maayong balita gikan sa lokal nga mga opisyal sa Bohol nga naduaw sa imahen ni Sr. Sto. Niño sa niaging tuig: Nitidlom na pag-ayo ang mga kaso sa ilegal nga pangisda. Di hinuon sila mokumpiyansa. Nagtinguha silang kadasonan ang pasiunang kalamposan pinaagi sa:
• Paghimong eco-tourism zones sa marine sanctuaries aron katanyagan og mas mapuslanong panginabuhi ang mga molupyo;
• Himuong bangka sa mga turista ang mga panagatan sa mga kanhi dinamitero; ug
• Butangan og higanteng mga hulagway ni Sr. Sto. Niño ang mga dapit nga kasagarang labayon og mga dinamita aron mas magpangikog na ang ilegal nga mga mangingisda.
* * *
Si Padre Tito Soquinio, tigpamaba sa Basilica del Sto. Niño ang gitahasan sa bag-ong kalihokan sa Piyesta Senyor karong tuiga. Siya mismo maglisod pagtuo sa kadasig ug kapaspas nga nagkatapok ug nagkahiusa sa NGOs nga pulos nagpakabana alang sa kalikopan. Wa pa silay ngan apan daghan nang napasiugdahan nga kalihokan. Matud niya kay tataw ang tumong, dali ra sila nga nagkahugpong.
Usa sa labihang daghana nga mga pasidungog ni Sr. Sto. Niño mao ang iyang pagka batobalani sa gugma. Ning higayona, ang iyang way kinutoban nga gugma maoy nahimong batobalani sa nagkalainlaing kahugpongan nga nag-iyahay unta sa ilang kalihokan. Dakong hagit karon alang nilang Padre Tito ug kaubanan unsaon pagpalapad sa pagpanakod sa pagpakabana alang sa mas sanag nga ugma sa mga bata.
* * *
Email:leo_lastimosa@abs-cbn.com