Usa ka Sugbuanon nga dugay nang nanimuyo sa Manila nipauli sa Sugbu dili lang aron mamista (Pista ni Sr. Sto. Niño) kundili usab sa pagtambong sa Halad 2010.
“Naintriga ko,” matud niya, “dihang gisultian ko bahin niining Halad 2010 sa akong mga paryente dinhi sa ato (Sugbu).”
Sa iya gyung pag-abot dinhi, nidiretso dayon siya sa opisina sa The Freeman aron sa pagpalit og tiket.
Naintriga kuno siya. Naikag siya. Tungod kay ang Halad 2010, sama sa ubang Halad sa miaging mga tuig, adunay kalainan tali sa ubang mga pasundayag sa entablado.
Ang Halad mihatag og preskong kinabuhi sa kultura ug tradisyon sa mga Sugbuanon kabahin sa musika ug mga butang nga kinaiya sa Sugbu.
Ang Halad usa ka brainchild ni Sir Dodong Gullas kang kansang gugma sa kinaiyang Sugbuanon walay makalalis.