Dengue atake na sab!

Pastilan, mao pa gani ang pagsugod sa tuig may namatay na usab sa dengue. Usa kini ka 10-anyos nga batang-babaye nga taga barangay Basak-Pardo.

Mora’g dili kini maayo nga tilimad-on kay wala pa gani semana sa pagsulod sa tuig 2010 apan may namatay na sa dengue.

Tan-aw nako nga dili lang ta magsalig g’yod sa taga City Health department, kita mismo kinahanglang manglimpyo g’yod sa atong palibot aron moislag ang mga lamok.

Ako bitaw kon dunay “spare time” nga dili kaayo magdali sa trabaho mangunay ko sa pagpanilhig sa palibot. Sa ingon nga paagi, dili ganahan ang mga lamok nga mopuyo.

Apan kon dili g’yod kapugngan nga masakit og dengue ang atong sakop sa pamilya, ayaw pagdugay-dugay, dad-a dayon sa doktor.

* * *

Naghisgot man ta og doktor, nalipay diay ko kay dawaton ni Dr. Edgar Abelgas ang tanyag ni Mayor Tomas Osmeña nga siya ang mag-hepe sa Cebu City Medical Center.

Tingali mao na kini ang higayon nga molambo na ang serbisyo sa CCMC gikan sa bati nga pagdumala ni Dr. Myrna Go. Gitug-anan ko ni Mayor Tommy kagahapon nga hisgotan niya uban ni CCMC administrator Rene Sanapo ang posibleng pagtudlo na ni Dr. Abelgas pagka hepe sa CCMC.

Kini god si Dr. Go, luya lang kaayo sa iyang pagdumala sa CCMC. Malooy tingali siya nga modukdok sa mga ligoy nga kawani. Unya maikog usab siya nga moduso g’yod ni Mayor Tommy sa iyang mga programa.

O kaha, wala g’yod siya’y maayong programa kay matud ni Tommy wala man g’yod siya’y nadawat nga maayong rekomendasyon gikan sa kadagkoan sa ospital.

Aw kon duna man gani unya ibutang nato nga nakalimot lang si Tommy, ayaw kataha Dr. Go sa pagkontak sa media aron ipahibalo ang mao nimong mga sugyot pagpalambo sa CCMC.

Ang nakadaut lang god aning Dr. Go kay kon imong pakighinabian hapit dili motingog, daw sa mahadlok og media. Ang mga tawo nga mahadlok og media kadto ra man unta nga may gitagoan.

Wala pa ko malimot nga dihay higayon nga akong giduol si Dr. Go og gisukna kabahin sa mga isyu sa CCMC, pastilan giawhag man hinoon ko nga adto mangutana ni Konsehal Christopher Alix.

Unsa ka god tawon nga matanga sa pagka hepe. Mao nga kaming mga reporter sa City Hall, pulos g’yod nagbagolbol ug apil sa misugyot nga pahulipan si Dr. Go sa katungdanan.

Kon dunay delikadeza kini si Dr. Go, karon nga nahibaw-an na niya nga wala nay pagsalig kaniya si Mayor Tommy, angay siya nga mohatag sa boluntaryo niya nga resignation.

Ngil-ad man god kaayo kon maabtan siya og relief order nga hulipan na siya. Aw ikaw, basin ganahan ka ra nga ingon niini ang mahitabo.

Karong Sabado, pamatud-an ni Mayor Tommy ngadto ni magpapatigayon Jonathan Guardo nga siya abtik ug takus pa mag-kongresista.

Tulo ka pulong-pulong sa bukid ang iyang ipahigayon. Bitaw maayo nga buhaton kini ni Tommy kay daghan ang magduda unya nga dili na siya haum sa public service.

Aw kami hinoong mga sakop sa media nga nag-cover sa City Hall nakabantay man g’yod nga miarang-arang na ang panglawas ni Tommy. Himsog na ang iyang panglawas og mibalik na ang iyang natural nga kolor sa pamanit.

Gikataw-an ni Tommy si Guardo kay sa duha ka buwan kuno sa wala pa ang pasko, 240 na ka pulong-pulong ang iyang napahigayon kay upat man sa matag gabii. Sa ato pa, abtik pa kuno siya.