Dihang walay trabaho ang Freeman kaniadtong Disyembre 24 ug 25, ingon man kaniadtong Enero 1, nakahigayon ko pagsuroy-suroy sa pipila ka dapit sa dakbayan.
Usa sa akong tumong mao ang pagkuha og pulso sa katawhan kabahin sa nagsingabot nga eleksyon.
Nasayran nako nga samtang daghan gihapon ang misuporta ni kanhi mayor Alvin Garcia, apan mas daghan g’yod ang mas pabor nga si Vice Mayor Michael Rama ang sunod nga magmayor.
Aw bisan ako, malipay ko pananglit si Rama maoy mahimong sunod nga mayor, ang ako lang nga kinahanglan unta nga magbaton siya og “political will” unya taktakon niya ang mga kawani sa dakbayan nga walay trabaho.
Si education consultant Joy Augustus Young mas paborito usab sa mga botante kay sa iyang higpit nga kontra pagka bise mayor. Mora’g hayag ang kadaugan nila ni Rama ug Young.
Sa pagka kongresista sa north district, nasayran nako nga daw “hot cake” si Rachel “Cutie” del Mar kon itandi ni Lahug barangay captain Mary Ann de los Santos.
Mao nga nalantaw na nakong daan ang naglayag nga kadaugan ni Cutie kay samtang nangangkon si De los Santos nga mas taas siya og edukasyon ug kinaadman kay kang Cutie, ang katawhan mas pabor man kang Cutie.
Kon mao ni, mora’g mangahapay sa kapildehan ang mga kandidato sa oposisyon dinhi sa north district. Sa pagka konsehal, duna hinooy pipila ka kandidato sa oposisyon nga mora’g lig-on.
Sa tulo ka adlaw namo nga walay trabaho, wala ko makahigayon pag-adto sa south district aron personal unta nga makakuha og pulso sa mga botante kon kinsa ang ilang paborito ni Atan Guardo ug mayor Tomas Osmena.
* * *
Nalipay ko kay mipasalig na si Ginang Margot Osmeña nga kon modaug siya pagka konsehal andam siya nga modawat sa hagit nga maoy mag-chair sa committee on heath and hospital services sa konseho.
Iya kining gipasalig atul sa Christmas party sa mga City Hall reporters, butang nga nakapalipay nako kay sigurado man nga molambo ang Cebu City Medical Center kon si Margot na ang magdumala sa committee on health.
Pagka karon god, lugak ang pagdumala nila ni Dr. Myrna Go, ingon man ni Konsehal Chris Alix, nga maoy chairman sa committee on health ug hospital services.
Unsaon, walay katakus si Alix nga moalkontra sa baruganan ni Mayor Tomas Osmeña nga buot gani nga mobaligya sa CCMC. Sayod usab ko nga dili tininuod ang kang mayor Osmeña nga ibaligya ang ospital.
Nasabtan nako nga gihimo niya kadto aron paghagit sa mga tagdumala sa ospital, apan unsaon nga lugak man si Dr. Go. Maayong ilisan kini si Go kon bag-o na ang administrasyon.
Si Alix pakyas sa iyang katungdanan kay wala makapagahin og dakung kantidad alang sa health services. Unsaon, pagaw man kini ug hapit dili motingog sa sesyon sa konseho.
* * *
Naminaw ko kagahapon sa interview sa radyo sa usa ka monghe diha sa Marian Shrine sa Sibonga, ug kon toohan nimo ang iyang pamahayag, makaingon ka nga dili na lang maayo nga mosimba diha.
Gibutyag ni “Frater Paul” kon Venancio Cabellon nga walay klaro kun asa mahipunta ang mga donasyon sa katawhan. Basta, dili na lang nako dugangan pero ang maong pamahayag makapaluya sa uban nga naghuna-huna nga moanha sa Marian Shrine.
Nagkatawa ko sa gibutyag ni Frater Paul nga sa una kuno, tuyoon g’yod nila nga magsul-ob og sapot nga hinimo sa sako sa harina aron nga makakuha og kalooy sa katawhan. Paita no?
Si Frater Paul, kinsa miangkon nga bayot, padayon nga miingon nga daghan sa mga monghe diha sa Marian Shrine susama kaniya.