Di kinahanglan mangampanya pa si Gloria pagka-Kongresista

Niining pagbalikbalik ni Presidente Arroyo sa Pampanga, ilabina sa iyang second district, ang mga Kapangpangan nangutana kon kining maong mga pagduaw ni Gloria, isip ba sa iyang pagka-Presidente, o pagka-kandidata.

Dili kini ma-separate ang duha. Alang nako, tungod kay Presidente pa man siya, di kinahanglan nga mangampanya pa tungod kay bisag asa siya paingon, ang iya gayung pagka-Presidente maoy makita sa katawhan, ug dili ang iyang pagka-kandidata.

Sa ato pa, iyang magamit ang tanang resources sa gobyerno, isip Presidente. Ug dili siya masaway niini tungod kay Presidente man. Ug bisag kapila siya unya magbalikbalik sa Pampanga, di kinahanglan nga iya pang kampanyahan ang taga-second district, kaylagi, gumikan sa iyang pagka-incumbent President, morag awtomatik na nga botohan gayud siya sa iyang katagilungsod. 

Ug tungod kay di man siya mangampanya, kaylagi, wa na kinahanglana, ang masubsob niyang pagduaw unya sa Pampanga, mga official visits, isip Presidente, ug dili isip congressional candidate. Busa, tungod kay mga official visits man, entitled siya paggamit sa mga resources sa kagamhanan.

Daghang mga proyekto ang iya unyang inagurahan sa Pampanga, mga tigum sa iyang mga sakop sa cabinet, launching sa mga dagkung proyekto sa lalawigan, ug uban pang mga official function sa Presidente. Niining maong mga okasyon, di kinahanglan moawhag si Gloria sa katawhan pagpabotar kaniya.

Mao ni ang nakasayop sa ubang mga Presidente sa atong nasod. Bisa’g si Marcos sa iyang pagka-bright, wa gyud kahunahuna niining nahunahunaan ni Gloria aron magpabilin sa gahom.

Silang tanan, gawas ni Marcos, ug gawas kon na-reelected, yano kaayong nanganaug sa pwesto, kaha nawili sa gahom, apan, wa gyud mangitag paagi nga mopilit sa gahom. Lainlain ang ambisyon sa tawo. Ug niining maong ambisyon ni Gloria, gipaluyohan man tingali sa iyang katagilungsod. Sa ato pa, kon kabubut-on sa lungsod, wa na tay mahimo niini. 

 At any rate, we congratulate in advance, Congresswoman Gloria Macapagal Arroyo, the incoming Speaker of the House, and the country’s first Prime Minister under the Parliamentary form of government! Hayahaya no? Swertiha sa Pilipinas no? Lupig sila!