Akong mga panghinaot ning Bag-ong Tuig

Mapopos na usab ang laing tuig sa atong pakigbisog ning madaug-daugon nga katilingban. Hinaot nga sa atong paglawig ug pagsugat sa Bag-ong Tuig hapsay ug malinawon ang atong mga huna-huna ug mga kasing-kasing biniyaan ang mga kasakit ug mga kagul-anan sa milabay’ng tuig. Mga kalipay ug kamaya unta ang atong mapaabot ning bag-ong tuig nga umaabot.

Ang matag pamilya magkahiusa ug magmalig-on unta isip bantayog sa atong nasud. Wa na unta’y pamilya nga magkatibulaag gumikan sa mga ginikanan nga wa magkasabot. Ingon man, wa na unta’y pamilya nga mabungkag tungod sa kasungiang mugna sa gugmang nagsalimoang. Wa na untay mga bata nga patyon bisan kun anaa pa kini sa sabakan sa ilang mga inahan tungod kay bunga sa gugmang tinagotago.

Ang mga pangulo sa nasud magkahiusa na unta alang sa kaayohan sa katawhan ug ipadaplin na unta ang bangi sa politika. Ipatigbabaw na unta nila ang interest sa nasud ug dili ang ilang kaugalingong interest. Mao na untay ilang iduso ang panginahanglan sa katawhan og dili ang ilang kaugalingong panginahanglan.

Ang Pilipinas mobarog unta sa padayon niining pagpakigbisog sa paglingkawas sa ekonomikanhong krisis ug makalingkawas na unta ang katawhan sa gapos sa kawad-on ug kalisod. Wa na untay patay ug krimin nga maghulga sa atong kinabuhi ug luwas na unta kita sa tanang panahon.

Unya hinaot upod unta nga wa nay magsaulog nato sa Bag-ong Tuig sulod sa mga tambalanan tungod kay nabuthan sa mga paboto o ba kaha naigo sa saag nga bala sa armas nga moboto

Kining tanan mga panghinaut lamang ning atong pagsugat sa Bag-ong Tuig nga umaabot. Kaninyong tanan, BULAHANG BAG-ONG TUIG.